Noticias Ver histórico
Vielha e Mijaran renòve es depòsits d’aigua cauda sanitària deth Palai de Gèu
Era actuacion, damb ua inversion de 87.951,77 èuros IVA includit, permeterà renauir eth sistèma d’acumulacion d’aigua cauda sanitària e melhorar eth servici as usatgèrs der equipament esportiu municipau
Er Ajuntament de Vielha e Mijaran impulse era substitucion des actuaus depòsits d’aigua cauda sanitària (ACS) deth Palai de Gèu, ua actuacion destinada a melhorar era qualitat deth servici, era eficiéncia dera installacion e es condicions de manteniment e contròl sanitari der equipament.
Es actuaus depòsits an arribat ath fin dera sua vida utila e presenten un estat avançat de deteriorament, damb oxidacion e pèrtes constantes. Un des tres depòsits se trape dehòra de servici, de manèra qu’era installacion foncione actuaument damb ua capacitat d’acumulacion aproximada de 6.000 litres, insufisenta entà respóner adequadament ara demanda d’aigua cauda enes periòdes de màger utilizacion der equipament, especiaument pendent er iuèrn.
Era actuacion, adjudicada per un impòrt de87.951,77 èuros IVA includit, prevé substituir es tres depòsits existents per quate naui depòsits d’acèr inoxidable, damb ua capacitat totau d’acumulacion de 9.000 litres. Aguesta renovacion permeterà recuperar e incrementar era capacitat deth sistèma, redusir es pèrtes termiques e melhorar era disponibilitat d’aigua cauda entàs usatgèrs deth Palai de Gèu.
Ath delà, es naues installacions s’adaptaràn as exigéncies actuaus en matèria de manteniment e contròl sanitari, facilitant es trabalhs d’inspeccion, neteja, desinfeccion e presa de mòstres e melhorant es condicions entà mantier era temperatura adequada der aigua.
«Eth Palai de Gèu ei un equipament fòrça utilizat e auem era responsabilitat de mantier e melhorar es sues installacions. Damb aguesta actuacion resolvem un problèma que hè temps qu’afècte ath servici d’aigua cauda e renovam ua installacion qu’auie arribat ath fin dera sua vida utila. Non se tracte sonque de cambiar uns depòsits, senon de contunhar invertint e trabalhar de forma planificada ena modernizacion der equipament e ena melhora deth servici que balham as usatgèrs», soslinhe eth 2au tinent d’alcalde de Vielha e Mijaran, Alberto López.
Era substitucion des depòsits forme part d’un procès mès ampli de melhora des installacions deth Palai de Gèu. Er Ajuntament trabalhe tanben ena renovacion deth hilat de distribucion d’aigua cauda sanitària enquias vestiaris e ena substitucion d’ua des caudères der equipament, damb er objectiu d’abordar progressivament es diferenti elements deth sistèma e melhorar era sua fiabilitat e eficiéncia.
D’aguesta manèra, er Ajuntament de Vielha e Mijaran contunhe avançant ena melhora e modernizacion deth Palai de Gèu, damb actuacions planificades per fases entà garantir eth bon foncionament e era qualitat des servicis d’un des principaus equipaments esportius deth municipi.
17/07/2026