Notícies Veir istoric
Er Ajuntament de Vielha e Mijaran trè a licitacion era crompa de nau materiau esportiu que permeterà milhorar diuèrsi equipaments deth Palai de Gèu
Per un costat, s’aquerirà ua vintia de maquines e elements que milhoraràn era sala fitness e, per un aute costat, se vò aquerir 57 parelhs de patins de loguèr entara pista de gèu
Er Ajuntament de Vielha e Mijaran seguís damb eth compromís de milhorar es servicis qu’aufrís eth Palai de Gèu as sòns usatgèrs. En aguest sens, acabe de trèir a licitacion era crompa de nau materiau que supausarà ua milhora considerabla de diuèrsi espacis d’aguesta installacion esportiua municipau.
Pendent es darrèri ans, er aument important d’usatgèrs que recep eth Palai, obligue a auer eth materiau enes condicions avientes e damb era quantitat que merite eth corrècte foncionament des espacis. D’aciu eth besonh d’aquerir aguest nau materiau.
Aguesta licitacion cònste de 2 lòts. Per un costat, un lòt d’aquesiment de maquinària e equipament esportiu de musculacion dera sala fitness. En aguest espaci, qu’ei equipat damb maquinària d’exercitacion càrdio-paumonar e maquinària de musculacion e pes liure, i a eth besonh de realizar era substitucion e aumentacion dera quantitat d’equipament esportiu que s’aufrís as usatgèrs. En totau 17 maquines e elements naui que serviràn entà balhar responsa ara nauta quantitat d’usatgèrs dera sala, atau coma substituir eth materiau obsolet. Aguest nau materiau ei: 2 maquines de musculacion, 1 supòrt de palfèr, 12 palfèrs de desparièr pes e 2 bancs de musculan ajustables.
Er aute lòt ei dirigit as usatgèrs dera pista de gèu. Concretaments, se procedirà ara crompa de 57 naui parelhs de patins de loguèr, autant entara mainadèra coma entara gent grana, de manèra que se milhorarà eth servici que s’aufrís.
Eth prumèr lòt (sala fitness) compde damb un pressupòst de 12.466,65€, mentre qu’eth dusau (pista de gèu), compde damb un pressupòst de 5.036,50€. Eth periòde de presentacion d’aufèrtes finalize eth 20 de deseme.
Des der equip de govèrn, son ja fòrça es intervencions que s’an hèt autant ena sala fitness, damb renauïment de materiau, coma ena pista de gèu, e en conjunt des espacis qu’englòben eth Palai de Gèu, en tot aufrir ua màger qualitat dera principau installacion esportiua de Vielha e Mijaran, e deth conjunt dera Val d’Aran.
En 2022, eth consistòri substituïc era vielha maquinària e aparelhs de musculacion deth gimnàs per uns mès modèrni. Concretament sigueren: 11 maquines de musculacion, 4 bancs, 8 barres olimpiques, 54 discs olimpics, 1 supòrt entàs barres olimpiques e 4 supòrts entàs discs olimpics.
“Seguim damb eth compromís de milhorar e aufrir ua màger qualitat des servicis deth Palai de Gèu as nòsti usatgèrs. En aguest cas, as usatgèrs dera sala fitness e era pista de gèu, qu’auien de besonh nau materiau”, comente eth còsso d’espòrts de Vielha e Mijaran, David Moreno. E ahig qu’“autant ena sala fitness coma ena pista de gèu i auem hèt milhores constants, e atau auem de seguir entà auer es espacis enes condicions avientes entara practica esportiua”.
Lieger mès
17/12/2024
Era Escòla Mairau “Era Cunhèra” de Vielha implemente era agenda digitau coma estrument entà milhorar era comunicacion dirècta diària damb es familhes
Lieger mès
29/11/2024
Er Ajuntament de Vielha e Mijaran trè a licitacion es òbres d’urbanizacion e adeqüacion des carrèrs Clòses e Montanero de Vielha
Lieger mès
28/11/2024
Eth plen der Ajuntament de Vielha e Mijaran apròve eth pressupòst municipau de 2025 per valor de 8.642.164,18€, eth mès naut dera sua istòria
Lieger mès
