Notícies Veir istoric
Eth Palai de Gèu barrarà deth 9 ath 12 de març pera realizacion de cates e assagi prealables deth projècte d’apariament dera estructura dera prumèra planta
Er Ajuntament de Vielha e Mijaran impulse un projècte entà apraiar patologies ena planta baisha e milhorar era impermeabilizacion perimetrau dera pista de gèu, damb er objectiu d’eliminar filtracions e aumentar era durabilitat der equipament
Er Ajuntament de Vielha e Mijaran informe qu’eth Palai de Gèu demorarà barrat deth 9 ath 12 de març entà amiar a tèrme cates, inspeccions e assagi tecnics prealables, que son imprescindibles entà completar eth projècte executiu d’apariament dera estructura dera prumèra planta e definir damb precision es accions de besonh.
Pendent aguest periòde se suspeneràn totes es activitats der equipament e se procedirà tanben ath barrament des servicis publics municipaus plaçadi en Palai de Gèu, includida era bibliotèca, damb era fin de garantir era seguretat d’usatgèrs e personau, facilitar er accès des equipes tecniques e perméter eth desvolopament des trabalhs sense interferéncies.
Es trabalhs programadi consistissen en ua campanha de revision e prenuda de donades que permeterà conéisher er estat reau des elements constructius, detectar possibles afeccions que non son visibles e determinar era solucion tecnica mès avienta. Aguesta fasa prealabla ei clau entà planificar ua intervencion eficaça e duradera, en tot ajustar eth projècte as besonhs reaus dera bastissa.
Eth projècte qu’impulse er Ajuntament a coma objectiu actuar sus patologies detectades ena planta baisha e, de forma complementària, milhorar era impermeabilizacion perimetrau dera pista de gèu, ua mesura determinanta entà redusir filtracions, protegir es espacis inferiors e milhorar era conservacion der equipament a miei e long termini.
Er impòrt deth contracte entara redaccion deth projècte executiu e era realizacion des trabalhs associadi ascendís a 56.250,05 € (IVA non includit).
Er Ajuntament arregraís era comprenença dera ciutadania e des persones usatgères e arrebrembe qu’informarà de quina actualizacion que sigue a trauès des canaus municipaus abituaus.
05/03/2026