Eth Palai de Gèu acuelh deth 17 ath 19 de gèr era celebracion dera Copa Vielha-Campionat de Catalonha de patinatge artistic
Aguesta competicion organizada peth CEGVA amassa damb era Federació Catalana d’Esports d’Hivern e era Real Federacion de Deportes de Hielo, compdarà damb totes es categories possibles: Nacionau A, B, C e ISU
Es pròplèu 17, 18 e 19 de gèr, eth Palai de Gèu de Vielha acuelh era celebracion dera Copa Vielha-Campionat de Catalonha de patinatge artistic. Un eveniment qu’ei un classic en Vielha e Mijaran e, mès concretaments, ena principau installacion esportiua dera Val d’Aran.
A compdar dera sua redubertura ena tardor de 2022, eth Palai de Gèu ja a acuelhut 3 viatges era Copa Vielha, en tot èster tanben 2 viatges Campionat de Catalonha.
Entà d’aguesta pròva s’i an inscrit 203 participaires de desparièrs clubs de d’Espanha (19 clubs) e d’Andòrra (1 club), en totes es categories existentes: Nacionau A, B, C e ISU. Aguesta chifra ei eth doble qu’era que i auec en Campionat de Catalonha celebrada en Puigcerdà ena tempsada 2023-24, e 110 esportistes mès qu’ena darrèra edicion dera Copa Vielha. Ei a díder, un succès de participacion qu’ajude a Vielha e Mijaran a plaçar-se coma destinacion referenta en mon des espòrts de gèu.
Coma ei abituau, i aurà ua vasta representacion de patinadors aranesi deth CEGVA. En totau 25 patinadors: 24 femenines e 1 masculin. Eth CEGVA ei eth club de Catalonha que mès participaires presente.
Era Copa Vielha-Campionat de Catalunya de Patinatge Artistic s’includís laguens dera Liga Nacional de Patinaje sobre Hielo (LNPH) organizada pera Real Federación de Deportes de Hielo.
“Un viatge mès era Copa Vielha de patinatge artistic tanben serà Campionat de Catalonha dera especialitat. Un succès entath Palai de Gèu e entà Vielha e Mijaran, en tot assolidar eth nòste municipi coma referent en Catalonha ena organizacion de campionats importanti d’aguesta disciplina esportiua”, comente eth baile de Vielha e Mijaran, Juan Antonio Serrano. E ahig que “eth Palai de Gèu tostemp a auut era capacitat entà acuélher competicions oficiaus coma Campionats de Catalonha, Campionats d’Espanha e tanben stages de tecnificacion damb entrenadors de gran renòm internacionau. Ath delà, èm des pòqui territòris que mantiem es espòrts de gèu pendent tot er an en Catalonha e era resta d’Espanha, en tot balhar un servici essenciau as aranesi e a toti es que mos visiten”.
16/01/2025
