Notícies Veir istoric
Er Ajuntament de Vielha e Mijaran milhore eth pati infantil dera Escòla Garona
S’amie a tèrme trabalhs de mantenement e seguretat: suprimir un desnivèu en un barrament, repintat d’un espaci entà crear una pissarra, remodelacion der espaci de sable entà jogar e milhora deth sistèma de canaus d’aigua
Er equip de govèrn der Ajuntament de Vielha e Mijaran realize pendent aguest setmana, un ample conjunt d’actuacions destinat a milhorar e adaptar es equipaments deth pati infantil dera Escòla Garona. A demana deth professorat deth centre, s’execute aguest projècte entà adaptar eth pati ath projècte pedagogic qu’ara madeish s’implante ena educacion infantila.
Per un costat, s’amie a tèrme trabalhs de mantenement: sanejament e milhora deth mur d’hormigon, cambi der espaci de sable entà jogar, milhora deth sistèma de canaus d’aigua (pr’amor que i auie filtracions d’aigua, agreujat peth pes dera nhèu) e repintat deth barrament metallic exterior.
D’aute biais, tanben se subministre eth pati damb naui jòcs infantils: dues codines de husta e un rocòdrom.
Eth conjunt d’aguestes accions a compdat damb un pressupòst finau de 15.810,44 €.
“Un des compromisi artenhuts pendent eth 2022 damb er equip directiu deth centre, eth Conselh Escolar e era Associacion de Familhes d’Alumnes dera Escòla Garona ere intervier enes espacis exteriors entà milhorar es sues installacions en benefici des mès joeni deth municipi. Es trabalhs que realizam aguesta setmana permeteràn qu’era mainadèra dera educacion infantila age eth pati en un estat fòrça milhorat e avient entà jogar”, comente eth segon tinent d’alcalde e còsso d’ensenhament de Vielha e Mijaran, Alberto López López. E ahig que “aguesta a estat era prumèra intervencion der an en aguest centre escolar, pr’amor qu’enes pròplèu mesi tanben installaram tres uarts pedagogics e reformaram eth pati gran des alumnes de primària”.
03/02/2023