Notícies Veir istoric
Eth Palai de Gèu acuelh eth 14 de gèr era celebracion dera Copa Vielha-Campionat de Catalonha de patinatge artistic
Aguesta competicion organizada peth CEGVA amassa damb era Federació Catalana d’Esports d’Hivern e era Real Federacion de Deportes de Hielo, compdarà damb totes es categories possibles: Nacionau A, B, C e ISU
Aguest pròplèu 14 de gèr, eth Palai de Gèu de Vielha acuelh era celebracion dera Copa Vielha-Campionat de Catalonha de patinatge artistic. Un eveniment que ère abituau ena installacion municipau abantes deth sòn barrament en març de 2021.
A compdar dera sua redubertura ena tardor de 2022, eth Palai de Gèu ja a acuelhut dus stages de tecnificacion de patinatge artistic e, ara, celebrarà era prumèra competicion.
Entà d’aguesta pròva s’i an inscrit participaires de desparièrs clubs de Catalonha e d’Andòrra, en totes es categories existentes: Nacionau A, B, C e ISU. D’aguesta manèra, era pista de gèu, mès er equipament en generau, retornen ara normalitat que i auie enquia 2021.
Er orari previst ei des 9 deth maitin enquia es 14 ores dera tarde, e eth liurament de prèmis s’amiarà a tèrme entàs 17 ores.
Era Copa Vielha-Campionat de Catalunya de Patinatge Artistic enguan s’includís laguens dera Liga Nacional de Patinaje sobre Hielo (LNPH) organizada pera Real Federación de Deportes de Hielo, que consistís en un circuit de ueit campionats autonomics Open, que s’acabarà damb era Finau de Liga eth 13 de mai ena pista de gèu de Madrid.
“Èm fòrça contenti de poder tornar a acuélher ua competicion oficiau en Palai de Gèu, pr’amor que dempús de fòrça temps de trabalh entà poder abilitar toti es servicis, sonque mos mancaue poder tornar a acuélher pròves esportiues damb esportistes arribadi de diuèrsi endrets”, comente eth baile de Vielha e Mijaran, Juan Antonio Serrano. E ahig que “eth Palai de Gèu tostemp a auut era capacitat entà acuélher competicions oficiaus e ara assolidam era tornada ara normalitat e demoram poder seguir en tot auer mès pròves en futur, en benefici de Vielha e Mijaran e der espòrt aranés en generau”.
11/01/2023