Notícies Veir istoric
Vielha e Mijaran epicentre esportiu d’aguesta dimenjada damb era celebracion d’una naua edicion dera Rodibook e era jornada esportiua Aran Per Espòrt
Eth dissabte 3 de seteme era Rodibook arribe ara sua 11au edicion, a on i aurà mès de 1200 participaires, e Èm Aran Sports Foundation organize era 2au jornada d’Aran Per Espòrt, damb ciclisme, caminada e corsa popular e ua olimpiada infantila
Pendent aguest dissabte 3 de seteme, Vielha e Mijaran tornarà a acuélher ua jornada a on er espòrt serà eth protagoniste en desparières disciplines.
Per un costat, era Rodibook, qu’enguan celèbre era 11au edicion, portarà a mès de 1200 motoristes, en ua rota de centeats de quilomètres peth Pirenèu aragonés, francés, andorran e catalan, en tot auer Vielha coma lòc de gessuda e d’arribada, coma ei abituau.
D’aute biais, Èm Aran Sports Foundation organize era 2au edicion dera jornada Aran Per Espòrt, ena que s’a premanit ua cronoescalada de 8,6 kms en biciclèta (Vielha-Bassa d’Oles), ua caminada (7,5 kms en tot arribar en Escunhau) e ua corsa populara (15 kms en tot pujar ara Tuca) e ua olimpiada junior e infantila. Totes es pròves an Vielha coma lòc de gessuda/arribada o d’ambdues. Damb es sòs requectadi se finançaràn bèques e ajudes as esportistes aranesi.
“Ua dimenjada mès, Vielha e Mijaran torne a plaçar-se coma er epicentre esportiu en Pirenèu damb era celebracion dera Rodibook e dera jornada Aran Per Espòrt. Diuèrses disciplines esportiues balharàn fòrça ambient as carrèrs de Vielha e as entorns naturaus deth municipi, en tot mercar lèu era fin d’un ostiu fòrça important entà Vielha e Mijaran a nivèu esportiu”, comente eth baile de Vielha e Mijaran, Juan Antonio Serrano.
02/09/2022