Notícies Veir istoric
Aguest dissabte 23 de junhsèga, se celèbre era 1èra edicion dera Vielha Cycling Tour damb gessuda e arribada en Vielha
Mès de 700 ciclistes participaràn en aguest eveniment non competitiu que trauèsse bona part des pòrts de montanha dera Val d’Aran e sud de França, en tot assolidar Vielha e Mijaran coma epicentre esportiu en Pirenèu
Dempús de dus ans de demora, arribe era 1èra edicion dera Vielha Cycling Tour aguest dissabte 23 de junhsèga.
Aguesta pròva non competitiua, aurà Vielha coma lòc de gessuda (entàs 8 ores) e d’arribada (plaça dera glèisa), e trauessarà bona part dera orografia dera Val d’Aran e deth sud de França.
Se demore era participacion de mès de 700 participaires, e compdarà damb era preséncia des ex ciclistes professionaus Samu Sánchez (Medalha d’Aur enes Jòcs Olimpics de Pekin de 2008) e d’Haimar Zubeldia (ciclista espanhòl damb mès participacions en Tour de França).
Era Vielha Cycling Tour ei organizat peth Club Ciclista Vielha, e qu’ei compausat de dues distàncies: Era de Miei Hons, de 90 kms, damb era pujada as pòrts deth Plan Batalhèr, Pòrt deth Portilhon (2 viatges) e arribada en Vielha, e era Gran Hons, de 155 kms, damb es madeishi pòrts, e damb er ahijut deth Pòrt de Balès e eth Guardadèr d’Arres.
En 2020 s’auec de suspéner era estrea pera pandémia dera COVID-19 e en 2021, deuant deth barrament indefinit deth Pòrt deth Portilhon decretat pes autoritats politiques franceses, era organizacion dera corsa se vedec obligada a suspéner er eveniment, dempús de non poder trapar un recorregut alternatiu.
“Èm fòrça satisfeti de qu’era Vielha Cycling Tour pogue estrear-se dempús de dus ans complicadi, e qu’ajude a assolidar a Vielha e Mijaran coma epicentre esportiu sostenible en Pirenèu”, comente eth baile de Vielha e Mijaran, Juan Antonio Serrano. E ahig que “a despièt de non èster ua pròva competitiua, fòrça gent i prenerà part e açò beneficiarà ath sector toristic deth municipi pendent aguesta pròplèu dimenjada”.
D’aute biais, eth 2au tinent d’alcalde e còsso d’espòrts, Alberto López, afirme que “era preséncia d’ex ciclistes professionaus balhe mès qualitat a d’aguest eveniment, que demoram que pogue assolidar-se en calendari d’ostiu de pròves esportiues deth nòste municipi pendent es pròplèu ans”.