Notícies Veir istoric
Finalizen es òbres de milhora dera accessibilitat e adaptacion des hilats deth servici d’aigua correnta e aigües lordes en casc antic de Vielha
Er Ajuntament de Vielha e Mijaran a intervengut enes carrèrs Pradets, Clòses, Marrèc, Dera Tor, Cuert, Des de Rodès, Lejau e Plaça Aplegadèr, en tot modernizar aguesti servicis que hège mès de 50 ans que non s’auien milhorat
Er Ajuntament de Vielha e Mijaran a finalizat es trabalhs de milhora ena accessibilitat e adeqüacion des hilats de servici d’aigua correnta e aigües lordes en diuèrsi carrèrs deth casc antic de Vielha, transversaus ath carrèr Major. S’a intervengut en ueit carrèrs: Pradets, Clòses, Marrèc, Dera Tor, Cuert, Des de Rodès, Lejau e Plaça Aplegadèr.
Aguesta actuacion que s’inicièc en ostiu de 2021 a supausat era milhora dera eficiéncia e era minimizacion des pèrtes deth hilat d’aigua correnta, atau coma era eliminacion der antic hilat de canerades de fibrociment e era installacion deth hilat separatiu d’aigües lordes.
Ath delà, aguesta intervencion adapte era qualitat d’aguesti servicis as besonhs creishenti de demana de milhora e reforma dera pavimentacion entà mantier ua corrècta imatge en aguest parçan de Vielha, que pendent bona part der an acuelh fòrça torisme.
“Auem modernizat es servicis d’aigua correnta e aigües lordes en un parçan de Vielha qu’ac auie de besonh, pr’amor que hège mès de 50 ans que non s’auien reformat”, comente eth baile de Vielha e Mijaran, Juan Antonio Serrano. E ahig que “eth casc antic de Vielha ei un des mès importanti qu’auem en pòble. Fòrça gent transite aguesti carrèrs ath long der an, pr’amor dera nauta preséncia de comèrci e establiments de restauracion e hotelèrs, e ère de besonh adaptar es hilats as besonhs actuaus”.
20/05/2022