Notícies Veir istoric
Comencen es òbres de reforma e melhora dera Avenguda Castièro de Vielha, damb es que s’ampliaràn es trepadèrs, en tot potenciar er èish comerciau
Aguesta intervencion, includida laguens deth plan d’urbanizacion e adeqüacion des trepadèrs de Vielha qu’execute er Ajuntament de Vielha e Mijaran enguan, favorirà era melhora dera accessibilitat e circulacion des pedons
Aguesta setmana, er Ajuntament de Vielha e Mijaran a iniciat es òbres de reforma dera Avenguda Castièro de Vielha, includides laguens eth plan d’urbanizacion e adeqüacion des trepadèrs deth cap-lòc dera Val d’Aran qu’eth consistòri amie a tèrme enguan.
Aguesta intervencion supause era melhora dera accessibilitat e circulacion des pedons, en tot ampliar er espaci entàs trepadèrs. D’aguesta manèra, en aguesta via, que junh era entrada de Vielha pera N-230 enquiath centre dera poblacion, se potenciarà er èish comerciau dera zòna, donques que se tracte d’ua des mès concorrudes de Vielha, damb ua grana varietat d’establiments comerciaus e otelèrs.
D’aute biais, se profitarà tanben entà realizar ua melhora deth sistèma de sanejament, damb ua naua installacion entara recuelhuda d’aigües dera ploja e lordes, donques qu’eth sistèma actuau ère obsolet e auie de besonh ua modernizacion e adaptacion as besonhs actuaus.
Ath delà, se procedirà ara implantacion d’un engodronat qu’aufrirà contunhitat ath ja existent ena entrada de Vielha, damb un acabament melhorat.
Tot aguest conjunt d’accions s’alongarà pendent diuèrses setmanes, en tot finalizar abans dera arribada der estiu.
Es òbres ena Avenguda Castièro hèn part d’un ample plan d’urbanizacion e adeqüacion des trepadèrs de Vielha, que contemple un totau de sèt accions: Avenguda Castièro, Avenguda dera Tuca, es carrèrs Clòses, Quate Lòcs, Pomaròla e Anglada, e eth camin de Casau.
“Era melhora dera Avenguda Castièro ei totaument de besonh, donques qu’ei un des principaus carrèrs dera poblacion, damb fòrça establiments comerciaus e otelèrs, e que, en sasons nautes, acuelh un gran nombre de visitaires”, comente eth baile de Vielha e Mijaran, Juan Antonio Serrano. E ahig que “d’aguesta manèra potenciam aguest punt clau de Vielha, en tot modernizar-lo e adaptar-lo as besonhs qu’a aué era poblacion”.
06/05/2022