Notícies Veir istoric
Er Ajuntament de Vielha e Mijaran comence es òbres entà bastir era pista poliesportiua exteriora de Vielha
Aguest nau equipament esportiu serà en foncionament aguest ostiu, en tot complementar era aufèrta d’installacions esportiues municipaus, apròp deth Palai de Gèu, eth Palai d’Espòrts, era pista de pàdel e era pista de fronton
Aguesta setmana an començat es òbres entà bastir era naua pista poliesportiua exteriora de Vielha. Aguest nau equipament esportiu serà plaçat en carrèr deth Puntet, ath cant dera actuau pista de pàdel, en tot complementar era aufèrta d’installacions esportiues municipaus que i a en municipi, amassa damb eth Palai de Gèu, eth Palai d’Espòrts, eth Centre Polivalent e era pista de fronton.
Laguens d’aguest espaci poliesportiu se realizarà era senhalizacion d’ua pista de fotbòl sala (25x16) e ua pista de basquet (28x15). Aguestes mesures balhen compliment a çò definit peth Consejo Superior de Deportes as normes NIDE.
Ath delà, ei previst amiar a tèrme un barrament perimetrau electrosoldat plastificat deth recinte, damb eth que se balharà ua sensacion de rigidesa mès grana e melhore era qualitat der acabat e evite er accès a persones non autorizades.
Sus aguest barrament, enes costats Nòrd e Oèst s’installarà un rèisha de nilon d’enquia 6 mètres de nautada entà evitar qu’es pilòtes queiguen en arriu Garona.
Er accès a d’aguest nau espaci poliesportiu se realizarà peth cornèr Oèst, damb ua pòrta de dues huelhes damb ua amplada de pas de 2 mètres.
Se deisharàn es canalizacions e es supòrts existents entà poder-i installar er enlumenat de besonh entath sòn emplec nocturn en un futur.
Eth pressupòst d’aguesta òbra ei de 89.900,34€, e ei previst que siguen prèstes aguest madeish ostiu, entà qu’es vesins deth municipi poguen emplegar era pista enes pròplèu mesi.
“Aguest nau equipament esportiu balhe responsa as demanes de moltes familhes de Vielha e Mijaran entà qu’es sons hilhs e hilhes agen un espaci exterior entath sòn léser esportiu. Volem revitalizar tota aguesta zòna que damb es equipaments esportius existents, coma son era pista de pàdel, fronton, Palai d’Esports, Palai de Gèu e es projèctes que licitam coma er Skate Park, era ampliacion deth passeig fluviau que permeterà crear un recorregut entà córrer e caminar, e era reforma integrau deth pati dera Escòla Garona damb un nau camp de fotbòl, melhoraràn es servicis qu’aufrís aguest Ajuntament a toti/es es sòns/sues vesins e vesies”, comente eth baile de Vielha e Mijaran, Juan Antonio Serrano.
27/04/2022