Notícies Veir istoric
Er Ajuntament de Vielha e Mijaran premanís un projècte de reforma deth pati infantil dera Escòla Garona
A demana deth professorat deth centre, enguan s’amiarà a tèrme un seguit de milhores que serviràn entà adaptar eth pati ath projècte pedagogic qu’ara madeish s’implante ena educacion infantila
Er equip de govèrn der Ajuntament de Vielha e Mijaran se trape en tot elaborar un ample projècte de milhora deth pati infantil dera Escòla Garona de Vielha.
Aguesta remodelacion s’amiarà a tèrme en tot seguir es demanes qu’eth professorat deth centre a hèt arribar ath consistòri entà adaptar eth pati dera escòla as besonhs qu’an entà poder complementar eth projècte educatiu ena etapa dera educacion infantila.
En aguest sens, s’elaboraràn melhores coma: creacion d’un circuit pintat en solèr deth pati entà poder hèr un recorregut entara mainadèra, creacion d’un rocòdrom en ua des parets lateraus deth pati, creacion d’un airau destinat a plaçar-i ua pissarra entà qu’er alumnat pogue diboishar e pintar o plaçar-i ua codineta entà jogar.
Atau madeish, se profitarà aguesta remodelacion entà desvolopar un seguit d’actuacions destinades a milhorar es condicions actuaus deth pati. En aguest sens, se realizarà ua reforma des rèishes que canalizen es aigües des pluges e dera nhèu, e s’apariarà er espaci de sable a on jòguen es petiti.
“Er equip de govèrn a acuelhut es demanes que mos a hèt arribar eth professorat dera Escòla Garona, e trabalharam enes pròplèu mesi entà adaptar eth pati as besonhs que pogue auer era mainadèra entà seguir damb era sua formacion academica enes milhores condicions”, comente eth baile de Vielha e Mijaran, Juan Antonio Serrano.
Totes es milhores deth pati infantil s’amiaràn a tèrme a compdar der ostiu, amassa damb es milhores deth pati gran qu’emplegue er alumnat dera educacion primària, de manèra que siguen prèstes de cara ath pròplèu cors escolar 2022-23.
05/04/2022