Notícies Veir istoric
Era Audiovisuau de Vielha acuelherà era projeccion deth documentau “15 ans dera Pedals de Foc Non Stop” eth pròplèu 16 d’abriu
Aguesta pròva ciclista, qu’aguest ostiu celebrarà era 16au edicion, ei un des principaus referents esportius deth Pirenèu damb participacions ath torn des 900/1000 corredors, en tot auer Vielha coma lòc de gessuda e d’arribada
Eth pròplèu 16 d’abriu a compdar des 19:30, era sala Era Audiovisuau de Vielha acuelherà era projeccion deth documentau “15 ans dera Pedals de Foc Non Stop”, dirigida per Joan Sabater.
Aguesta corsa de longa distància, iniciada en an 2006, a estat diuèrsi viatges Campionat d’Espanha dera disciplina, e d’Euròpa (de 2016 a 2019) e ei un des grans referents deth calendari esportiu de Vielha e Mijaran e dera Val d’Aran cada an.
Era Pedals de Foc s’estreèc en 2006 damb sonque 120 participaires, e pendent diuèrses edicions era participacion siguec ath torn des 900/1000 corredors arribadi de diuèrsi lòcs deth mon, en tot generar ua importanta repercussion economica entath sector toristic de Vielha e Mijaran pendent tota ua dimenjada, en tot acuélher corredors e familhars. En aguest sens, ath delà dera vesant competitiva, a favorit era arribada de torisme familhar en municipi.
Aguest documentau ei un recuelh des milhors imatges qu’a aufrit aguesta pròva de BTT ath long des 15 ans de celebracion (sonque s’auec de suspéner en 2020 a conseqüéncia dera aparicion dera COVID-19) e qu’a ajudat a plaçar Vielha e Mijaran en mapa internacionau des competicions esportives.
Dempús dera projeccion deth documentau se celebrarà ua taula redona damb eth director dera projeccion, Joan Sabater e damb eth corredor Llibert Mill, guanhador de 6 edicions dera Pedals de Foc Non Stop e qu’a participat en 14 edicions. En aguesta taula redona se harà un repàs ara evolucion qu’a patit era corsa ath long des ans.
“En nòm der Ajuntament de Vielha e Mijaran voi arregraïr e felicitar ar equip dera Pedals de Foc Non Stop e, especiaument, ath sòn director Pep Vega, per mantier viua aguesta competicion dempús de tanti ans, qu’ei un classic en nòste calendari esportiu damb ua nauta participacion e que genère ua repercussion economica importanta entath nòste municipi”, comente eth baile de Vielha e Mijaran, Juan Antonio Serrano. E ahig que “15 ans demòstren eth bon trabalh realizat, e pera nòsta part seguiram en tot collaborar ena organizacion d’aguest eveniment, pr’amor que mos assolide coma referent esportiu enes Pirenèus, damb ua grana projeccion internacionau, e en tot favorir era arribada de torisme familhar ath municipi”.
Pera sua part, Pep Vega, remèrque qu’enguan era pròva ”torne as sòns origens, en tot recuperar er esperit popular dera pròva, e de rèpte personau, en un territòri fòrça polit e damb païsatges beròis coma ei eth Pirenèu. Volem arregraïr ar Ajuntament de Vielha e Mijaran era sua collaboracion pendent toti aguesti ans, e per açò volem qu’era presentacion oficiau deth documentau se hèsque en Vielha”.
Era 16au edicion dera Pedals de Foc Non Stop se celebrarà der 1 ath 3 de junhsèga. Es inscripcions ja son dubèrtes, e actuaument i a ath torn des 600 inscrits. Era prevision ei superar es 900 participaires.
04/04/2022