Notícies Veir istoric
Er Ajuntament de Vielha e Mijaran inície es trabalhs de substitucion e milhora deth hilat d’aigua en carrèr Major d’Arròs
Aguesta intervencion, avalorada en 17.919,40€, supausarà eth cambi dera canerada per ua naua de polietilen, qu’ei mès resistenta, e era milhora dera cauçada deth carrèr en un tram de 40 mètres
Pendent aguesta setmana s’an iniciat en carrèr Major d’Arròs es trabalhs de substitucion e de milhora deth hilat d’aigua. Ua intervencion fòrça de besonh, pr’amor qu’aguest servici se trapaue en un estat maumerenc.
Damb un pressupòst de 17.919,40€, er Ajuntament de Vielha e Mijaran procedís a substituïr es canerades que i a en aguesta via, pr’amor que i a agut diuèrses incidéncies en mantenement d’aguestes canerades que subministren a diuèrses viuendes, que tanben a deteriorat eth paviment deth carrèr, en un tram de 40 mètres. Aguestes vielhes canerades seràn substituïdes per ues naues de polietilen, que son fòrça mès resistentes. Ath delà, en tot tractar-se d’un carrèr arribent, dificultaue eth transit autant de veïculs coma des persones. Era cauçada ère maumerenca pr’amor des nheuades e climatologia advèrsa, e peth pas deth temps.
Damb aguesta òbra se condicionarà aguest tram de carrèr en tot milhorar es servicis as vesins d’aguesta zòna, laguens dera obligacion de hèr un mentenement avient entà garantir-ne eth servici.
Se demore qu’aguesta intervencion sigue prèsta en quinze dies, quan dempús d’auer substituït era canerada, s’age acabat de plaçar eth nau paviment en tot eth tram deth carrèr.
”Damb era milhora d’aguestes canerades d’aigua en carrèr Major d’Arròs, des der Ajuntament de Vielha e Mijaran mantiem eth nòste compromís de milhora deth hilat d’aigua e depòsits de toti es pòbles deth municipi”, comente eth baile der Ajuntament de Vielha e Mijaran, Juan Antonio Serrano. E ahig que “hè uns mesi aparièrem eth depòsit d’Arròs, e ara damb aguesta naua intervencion, refortilham e garantim eth servici avient d’un besonh basic coma ei era aigua potabla”.
29/01/2022