Notícies Veir istoric
Er Ajuntament de Vielha e Mijaran signe un convèni damb era AMPA dera Escòla Garona entà subvencionar era crompa de nau equipament informatic ar alumnat de 3au de Primària
Damb aguesta naua ajuda, enguan eth consistòri aurà destinat un totau de 5650€ entar aquesiment d’ordenadors as escolans de 3au e 4au de Primària, en tot supausar ua importanta ajuda economica entàs familhes
Er Ajuntament de Vielha e Mijaran a formalizat er acòrd de collaboracion damb era AMPA dera Escòla Garona de cara ath cors escolar 2021-22 entara subvencion d’equipament informatic.
En aguest sens, eth consistòri a signat un convèni damb era AMPA dera Escòla Garona de Vielha entara ajuda ena crompa de naui ordenadors que poderàn gaudir es escolans/es de 3au cors dera Educacion Primària.
Aguest acòrd s’ahig ath convèni signat eth passat mes de hereuèr entà ajudar ar alumnat de 4au cors. D’aguesta manèra, toti es escolans de dusau cicle de Primària (3au e 4au cors) auràn equipament informatic en condicions avientes entà poder seguir eth desvolopament abituau des classes.
“Des der Ajuntament de Vielha e Mijaran èm conscienti qu’era Escòla Garona a de besonh equipaments informatics en bones condicions, mès encara en mon digitau que viuem aué dia, entà poder prestar un servici d’ensenhament de qualitat entàs nòsti/es escolans/es”, comente eth baile de Vielha e Mijaran, Juan Antonio Serrano. E hig que “er Ajuntament tostemp a apostat per collaborar en çò qu’agen de besonh es centres educatius de Vielha e Mijaran, entà qu’es joeni/es agen es màgers facilitats possibles ena sua formacion academica”.
04/12/2021