Notícies Veir istoric
Vielha e Mijaran presente dus projèctes entà optar as hons europèus ’NextGenerationEU’, tà melhorar era eficiéncia energética en municipi
Eth consistòri a presentat un projècte entà obtier ua melhora dera eficiéncia energetica deth Palai de Gèu e un dusau entà plaçar enlumenat LED en toti es pòbles deth municipi, tanben en tot cercar ua melhora energetica enes espacis publics
Er Ajuntament de Vielha e Mijaran participe en procès de presentacion de projèctes entà obtier ua ajuda enes hons europèus ’NextGenerationEU’.
Aguesti hons son dirigidi a paliar es damatges economics e sociaus immediats causadi pera pandémia dera COVID-19. Era Union Europea a metut en foncionament aguesta airina temporau dotada damb mès de 800.000 milions d’èuros. Eth Plan de Recuperacion, Transformacion e Resiliéncia qu’a impulsat eth Govèrn d’Espanha entà canalizar aguestes ajudes, modernizarà era administracion e fomentarà era economia verda, entre d’auti ahèrs.
En cas de Vielha e Mijaran, eth consistòri i a prenut part en tot presentar dus projèctes: un de melhora dera eficiéncia energetica deth Palai de Gèu e un dusau entà plaçar enlumenat LED en tot eth municipi, en tot cercar tanben ua melhora energetica enes espacis publics.
“Damb aguesti projèctes qu’auem presentat as hons europèus, seguim damb er objectiu d’arténher un municipi de Vielha e Mijaran sostenible e eficient, ena sua gestion energetica de cara ath futur”, comente eth baile de Vielha e Mijaran, Juan Antonio Serrano. E ahig que “en cas d’obtier aguestes ajudes economiques, artenheram un amendriment enes consums energetics deth municipi, en tot melhorar era sua eficiéncia”.
19/11/2021