Notícies Veir istoric
Vielha e Mijaran renauís er acòrd de collaboracion damb er Institut d’Aran entà auer alumnes en practiques en centres de trabalh municipaus
Pendent er actuau cors escolar, ua alumna deth Cicle Formatiu de Grad Mejan de Gestion Administratiua se trape en tot realizar es sues practiques en Palai de Gèu de Vielha
Un an mès, er Ajuntament de Vielha e Mijaran e er Institut d’Aran an signat er acòrd entà mantier era collaboracion entà auer alumnes deth centre, en tot realizar formacions practiques enes equipaments municipaus pendent er actuau cors escolar.
Enguan, ua alumna deth Cicle Formatiu de Grad Mejan de Gestion Administratiua (CFGM-GAD) realize es sues practiques en Palai de Gèu de Vielha, damb orari de 3 ores diàries de deluns a diuendres, enquia completar es 416 ores totaus, que finalizaràn eth pròplèu mes de mai.
Es practiques consistissen en prètzhèts restacadi damb es airaus de transmission de comunicacion, documentacion, atencion ath client, recorsi umans, supòrt administratiu en equips de trabalh e servicis prestadi per entitats o organismes publics.
Damb aguestes practiques se li balhe ara joenessa era possibilitat de conéisher de prumèra man eth foncionament dera administracion publica e formar-se en era.
“Des der Ajuntament mantiem aguest acòrd damb er Institut d’Aran, entà qu’es nòsti/es joeni/es agen eth sòn prumèr contacte damb eth mon laborau e poguen veir es possibilitats de trabalh que les pòt aufrir ua administracion publica", comente eth dusau tinent d’alcalde e còsso d’ensenhament de Vielha e Mijaran, Alberto López.
15/11/2021