Notícies Veir istoric
Vielha e Mijaran realizarà trabalhs de poda des arbes plaçadi ath cant deth parcatge des antigues casèrnes militares, en tot melhorar era seguretat de veïculs e pedons
A compdar dera pròplèu setmana se rebaisharà era copa des exemplars de bibo auba, en tot evitar que pendent era sason d’iuèrn i pogue auer cap tipe d’accident a conseqüéncia des nheuades e des gelades
A compdar deth pròplèu deluns 15 de noveme, er Ajuntament de Vielha e Mijaran començarà a realizar trabalhs de poda des arbes plaçadi ath cant deth parcatge des antigues casèrnes militares, apròp der arriu Garona, damb er objectiu de melhorar era seguretat des veïculs e des pedons que transiten per aguest endret.
Es trabalhs consistiràn ena rebaisha des copes des exemplars de bibo auba, en tot evitar que pendent era sason d’iuèrn i pogue auer cap tipe d’accident a conseqüéncia des nheuades e des gelades tipiques d’aguesta epòca der an.
Entà poder amiar a tèrme aguesta intervencion damb totau seguretat, se demane as vesins qu’abantes d’aguesta dimenjada retiren es veïculs que se trapen parcadi ath cant des arbes, e que non les parquen de cara as pròplèu dies, entà per’mor de garantir un espaci entara execucion des prètzhèts e que se poguen hèr damb era màger rapidesa possible.
“Damb aguesta actuacion enes arbes, previem possibles accidents pendent era sason d’iuèrn, en tot suenhar era seguretat des veïculs que circulen e des pedons que transiten peth parcatge”, comente eth còsso d’òbres e servicis de Vielha e Mijaran, Jacint Cuny.
09/11/2021