Notícies Veir istoric
Vielha celebrarà ua gala solidària eth pròplèu 31 d’octobre en benefici des afectadi peth volcan de La Palma
Era Sala Polivalenta acuelherà un espectacle de dances araneses damb es grops Còlha Santa Maria de Mijaran e Es Fradins de Vielha entà arremassar sòs qu’anaràn destinadi entath Cabildo Insular de La Palma
Er Ajuntament de Vielha e Mijaran, juntament damb es còlhes de dances deth municipi e es Volentaris d’Aran, a organizat entath pròplèu 31 d’octobre, ena Sala Polivalenta de Vielha ua gala solidària entà requectar sòs qu’anaràn destinadi as afectadi pes episòdis d’erupcion volcanica ena isla canària de La Palma.
Es grups de dances aranesi d’Era Còlha de Santa Maria de Mijaran e Es Fradins de Vielha realizaràn un espectacle de folclòre tipic aranés, a compdar des 18 ores.
Cau rebrembar qu’eth volcan Cumbre Vieja comencèc a actuar eth passat 19 de seteme, en tot auer afectat aué dia a mès de 866 ectares e a mès de 2185 edificacions. Mès de 7000 persones an estat evacuades.
“Damb era celebracion d’aguest eveniment, çò que volem ei mostrar er esperit solidari de Vielha e Mijaran e deth conjunt dera Val d’Aran damb era ciutadania de La Palma que viu uns moments fòrça complicadi dempús d’auer perdut era sua viuenda a conseqüéncia dera accion deth volcan Cumbre Vieja”, comente eth baile de Vielha e Mijaran, Juan Antonio Serrano. E ahig que “des der Ajuntament de Vielha e Mijaran mostram tot eth nòstre supòrt ara gent de La Palma, e demoram qu’aguest gèst pogue servir entà ajudar a fòrça persones”.
22/10/2021