Notícies Veir istoric
Er Ajuntament de Vielha e Mijaran apròve era 3au modificacion de credit deth pressupòst de 2021
En aguesta modificacion destaque era inversion entà cambiar eth vas dera piscina grana deth Palai de Gèu, atau coma era substitucion de tota era maquinària deth gimnàs, e era reforma de diuèrsi parcs infantils e era creacion d’un de nau
Aguest maitin, eth plen der Ajuntament de Vielha e Mijaran a aprovat era 3au modificacion de credit deth pressupòst municipau de 2021, avalorat en 827.600 €
Laguens d’aguesta modificacion s’includís ua partida de 61.000 € entà cambiar eth vas dera piscina grana deth Palai de Gèu, atau coma era substitucion de totes es maquines qu’empleguen es usatgèrs deth gimnàs d’aguesta installacion esportiua municipau, avalorat en 60.000 €. Tanben ei previst era substitucion des compressors dera pista de gèu, en tot botjar-les de lòc, pr’amor qu’es actuaus realizen un tapatge fòrça anaut, damb ua inversion de 107.000 €. Ath delà, tanben s’a includit ua partida de 90.000 € entara reforma de diuèrsi parcs infantils e era creacion d’un de nau.
Aguesta modificacion a gessut endeuant damb es vòts a favor der equip de govèrn d’Unitat d’Aran, e es vòts en contra des partits dera oposicion de Convergéncia Aranesa e d’Aran-Amassa.
15/10/2021