Notícies Veir istoric
Er Ajuntament de Vielha e Mijaran, eth Grèmi d’Ostalaria dera Val d’Aran e eth Servei d’Ocupació de Catalunya presenten era 3au edicion deth Job Dating, qu’aurà lòc eth 14 de octobre en Palai d’Espòrts de Vielha
Aguest eveniment preten méter en contacte a trebalhadors e empreses deth territòri en ua jornada que fomente era aucupacion e es contractacions, en tot facilitar er accès ath mon laborau deuant dera sason d’iuèrn 2021/22.
Aguest dijaus, era Sala de Plens der Ajuntament de Vielha e Mijaran a acuelhut era presentacion dera tresau edicion deth Job Dating, qu’aurà lòc eth pròplèu 14 de octobre en Palai d’Espòrts de Vielha des 10:00 as 13:00.
Aguest eveniment organizat peth SOC de Vielha, amassa damb eth Grèmi d’Ostalaria dera Val d’Aran e er Ajuntament de Vielha e Mijaran, tanben compde damb era collaboracion deth Conselh Generau d’Aran e er Ajuntament de Naut Aran. Er objectiu ei fomentar er escambi entre empreses e trabalhadors dera Val d’Aran, atau coma de gent arribada de dehòra, entà que se poguen assolidar contractacions laboraus de cara ara sason d’iuèrn que començarà lèu.
Ar acte de presentacion i a assistit eth baile de Vielha e Mijaran, Juan Antonio Serrano, eth 2au tinent d’alcalde de Vielha e Mijaran, Alberto López, era cap deth Servei Territorial d’Ocupació de Lleida, Alt Pirineu i Aran, Maria Jesús Marvá e eth president deth Grèmi d’Ostalaria dera Val d’Aran, Xacobe Bartolomé.
Dempús der exit des dues prumères edicions, a on lèu 1000 persones participèren en tot hèr entrevistes e presentar curriuculums vitae, en 2020 non se podec celebrar aguest eveniment a conseqüéncia dera aparicion dera pandémia dera COVID-19. S’aufrissen mès de 200 lòcs de trabalh, en tot auer confirmat era sua preséncia 30 empreses.
Ei important qu’era gent que s’apròpe ath Job Dating ac hèsque damb eth sòn curriculum vitae, pr’amor qu’es empreses poderàn amiar a tèrme entrevistes en madeish Palai d’Espòrts. Mès, entà toti aqueri que non poguen vier ath Job Dating, an ara sua disposicion era direccion de corrèu electronic otg_vielha.soc@gencat.cat entà enviar es curriculum vitae, e eth SOC de Vielha les ac trasladarà as empreses interessades. Atau madeish, enguan, coma nauetat, s’a creat un còdi QR ath qu’es interessadi poderàn accedir entà aumplir eth formulari dera organizacion.
“Des der Ajuntament de Vielha e Mijaran demoram qu’aguesta tresau edicion deth Job Dating confirme er exit que ja artenhérem enes dues prumères edicions, en ua iniciativa que beneficie autant a empreses coma trabalhadors entà facilitar er accès ath mon laborau en ua epòca fòrça importanta, coma ei era sason d’iuèrn”, comente eth baile de Vielha e Mijaran, Juan Antonio Serrano. E hig que “demorem que damb es ans, eth Job Dating sigue ua apòsta fixa e segura entà favorir es contractacions laboraus en nòste territòri.”