Notícies Veir istoric
Er Ajuntament de Vielha e Mijaran inaugure es òbres de melhora deth Casau deth Jubilat “Sant Miquèu” de Vielha
Eth consistòri a realizat era reabilitacion integrau d’aguest equipament municipau qu’a compdat damb era collaboracion dera Fundació “la Caixa” e CaixaBank, damb ua aportacion de 13.500 € damb era que s’a renovat eth sòn mobiliari
Er Ajuntament de Vielha e Mijaran a amiat a tèrme era inauguracion des trabalhs realizadi en 2020 e 2021 en Casau deth Jubilat “Sant Miquèu” de Vielha.
En aguesta inaguracion s’a mostrat era reabilitacion integrau que se hec en interior d’aguest equipament municipau, en tot profitar eth sòn barrament a conseqüéncia dera aparicion dera pandémia dera COVID-19, damb un lauat d’imatge a nivèu de pentura, enlumenat e substitucion deth solèr.
Atau madeish, CaixaBank, a trauès d’ua aportacion economica dera Fundació “la Caixa”, a mostrat eth sòn supòrt en Casau deth Jubilat, peth cambi deth mobiliari, en tot aquerir-ne de nau, que supause eth renauiment deth materiau basic que permet melhorar es condicions dera installacion de cara as sòns usatgèrs. Era entitat a arrecebut ua collaboracion de 13.500 €.
Era
gent grana ei un des pilars a on eth consistòri e era fondacion
privada vòlen seguir en tot cooperar e, en aguest cas, entà
invertir en melhorar un des espacis d’òci de dia damb mès
tradicion en aguest sector dera societat en municipi de Vielha e
Mijaran.
Autant
er Ajuntament de Vielha e Mijaran coma CaixaBank e Fundació “la
Caixa” pòrten ans en tot collaborar de manèra conjunta ena
melhora des installacions municipaus. Er an 2018, gràcies a un acòrd
entre ambdues institucions, se dauric eth Centre de Joenessa “Antara”
de Vielha. Era fondacion financèc er aquesiment des equipaments de
besonh entath foncionament ordinari d’aguesta installacion
destinada ara joenessa, que compde damb tot eth materiau logistic e
de contengut entà que poguen gaudir d’aguest locau.
“Era remodelacion que s’a hèt en Casau deth Jubilat ère ua accion fòrça de besonh, en tot modernizar-la entà aufrir as sòns usatgèrs un equipament enes condicions que meriten”, comente eth baile de Vielha e Mijaran, Juan Antonio Serrano. E ahig que “aguesta òbra permeterà contunhar en ues condicions mès avientes damb es activitats organizades pera associacion deth jubilat, en tot aportar ua melhora ena qualitat de vida e benèster des persones que i participen pendent tot er an”.
30/09/2021