Notícies Veir istoric
Er Ajuntament de Vielha e Mijaran organize aguesta tardor eth cicle “Teatre Familhar 2021” que s’amiarà a tèrme un viatge ath mes, de seteme a deseme
Era Audiovisuau de Vielha acuelherà un totau de 4 espectacles variadi, damb entrada a 5 €, enes que i aurà fòrça diversion entà tota era familha
Er Ajuntament de Vielha e Mijaran met en foncionament aguesta tardor eth cicle “Teatre Familhar 2021” damb eth qu’aufrirà espectacles entà que toti es membres dera familha poguen gaudir d’ua serada tanplan divertida, entre es mesi de seteme e deseme.
En totau, eth cicle ei compausat de 4 espectacles qu’auràn lòc un viatge ath mes, ena jornada de dissabte, a compdar des 18 ores ena Sala Era Audiovisuau de Vielha.
Eth cicle s’encète eth 25 de seteme, damb era actuacion que pòrte per nòm “La Princesa en Texans (dera companhia Sgratta), qu’ei ua òbra de teatre familhar ena que se preten trincar estereotips en tot arrir fòrça pendent era serada.
Eth 23 d’octobre, era actuacion “En la Boca del Lobo” (dera companhia Los Titiriteros de Binéfar), mos portarà un montatge damb masques e pipòts damb cançons, condes e fòrça mès suspreses en tot parlar dera cultura populara, damb interaccion directa entre es actors e eth public.
Eth 20 de noveme, arribe era òbra “Xarivari” (dera companhia Teatre Mòbil), ena que i aurà un espectacle comic, mès ath madeish viatge damb fòrça màgia e suspreses. Petites istòries que son ua barreja de numeròs de palhassos e de conde fantastic.
E, fin finau, eth 18 de deseme, entà barrar eth cicle, aurà lòc er espectacle “Somiacaixes” (dera companhia de teatre Anna Roca), en qu’era pròpria Anna Roca mos explicarà condes e istòries a partir deth confinament patit en 2020.
“Des der Ajuntament de Vielha e Mijaran auem establit un programa fòrça ample e variat entà que pendent aguesta tardor, tota era familha pogue gaudir de diuèrsi espectacles agradius”, comente era còsso de cultura, Raquel Martínez. E ahig que “era bona situacion en relacion ara pandémia mos permet recuperar e prebotjar, un aute viatge, activitats culturaus entà que pendent bona part der an i pogue auer ua aufèrta diuèrsa, en tot emplegar, en aguest cas, Era Audiovisuau coma lòc de celebracion d’aguesti espectacles”.