Notícies Veir istoric
Eth Centre Polivalent de Vielha acuelh aguest dimenge es jornades internacionaus folcloriques d’ADIFOLK, damb ua mòstra de dances de Macedònia deth Nòrd
Aguest cicle gratuït qu’a lòc per tota Catalonha, enguan celèbre era sua 49au edicion, e arribe per prumèr viatge ena Val d’Aran, damb era participacion des còlhes de dances tradicionaus araneses, en tot èster organizat per Es Fradins
Aguest dimenge 5 de seteme, eth Centre Polivalent de Vielha acuelh era celebracion des jornades internacionaus folcloriques d’ADIFOLK, que s’amien a tèrme en ua vintia de poblacions de Catalonha. Eth Centre Polivalent serà er escenari d’ua mòstra de dances deth Conjunt Nacionau Albanés de Macedònia deth Nòrd, a compdar des 18:30, e d’ua ora e mieja de durada.
Ei eth prumèr viatge que Vielha e era Val d’Aran acuelhen aguestes jornades culturaus, e ac hèn dera man d’Es Fradins de Vielha, damb era collaboracion der Ajuntament de Vielha e Mijaran e deth Conselh Generau d’Aran. Aguest cicle artenh era 49au edicion en Catalonha, damb era preséncia de grups folclorics de musica e dança de tot eth mon, pendent eth 3 e eth 12 de seteme. En Vielha, es desparières còlhes de dances (Es Fradins de Vielha, era Còlha de Santa Maria de Mijaran, es Sautarèths de Bossòst e es Corbilhuèrs de Les), aufriràn un Tricotè, coma mòstra aranesa en aguest hestau, abantes de gaudir der espectacle de dances albaneses.
Era entrada a d’aguest espectacle ei gratuïta, mès a conseqüéncia dera pandémia dera COVID-19, er aforament ei limitat e s’auràn de seguir es mesures sanitàries vigentes. Es entrades se pòden aquerir ena Oficina de Torisme de Vielha.
“Ei un gran aunor entà Vielha e Mijaran poder compdar damb era preséncia, per prumèr viatge en nòste territòri, deth hestau de jornades internacionaus folcloriques d’ADIFOLK. Es nòstes còlhes haràn ua petita mòstra des dances tradicionaus araneses, ath viatge que gaudiram de dances d’un país europèu coma ei Macedònia deth Nòrd”, comente era còsso de cultura de Vielha e Mijaran, Raquel Martinez. E ahig que “era bona situacion en relacion ara pandémia mos permet acuélher aguest tipe d’eveniments, en tot préner es mesures avientes entà evitar contagis e, atau, poder gaudir d’ua serada culturau de qualitat”.
Pera sua part, Cristina Riu, presidenta d’Es Fradins de Vielha, comente que “ei ua grana escadença entà escambiar cultura entre era Val d’Aran e Macedònia deth Nòrd. Es desparièrs grups de dances aranesi mos auem metut d’acòrd entà barar un Tricotè, coma mòstra de benvenguda ath grup convidat, e gaudir amassa d’aguesta serada culturau”.