Notícies Veir istoric
Eth Palai d’Esports acuelh eth torneg ‘Vielha-Aran, Tèrra ACB’
Damb victòria deth Joventut ath deuant deth Baskonia
Eth Palai d’Espòrts de Vielha acuelhec dijaus 11 de seteme era cincau edicion deth Torneg ‘Vielha-Aran, Tèrra ACB’ entre eth FIATC Joventut de Badalona e eth Baskonia Laboral Kutxa que finalizèc damb victòria deth quadre catalan per 69-66, deuant de mès de 150 persones presentes en pabalhon deth cap-lòc dera Val d’Aran.
Era prumèra part se barrèc damb un igualat 35-35, dempús d’un prumèr quart que siguec entàs de Vitòria (14-24). En dusau acte, totes dues equipes aueren fòrces semblantes e arribèren as pòrtes deth darrèr quart damb un 52-50 en favor deth Joventut. Dempús d’un finau fòrça ajustat, es verd-e-neres s’emportèren eth trionf (69-66).
Dempús dera amassada, l’Ajuntament de Vielha e Mijaran arrecebec as dus conjunts sus era pista. Eth còsso d’Espòrts e Joenessa, Agustín Calbetó, dèc es “gràcies as dues equipes per participar er aguest torneg. Ei eth quatau còp qu’eth Badalona ven a Vielha, e eth dusau deth Laboral Kutxa, e demoram que poguen vier mès viatges”.
Entà finalizar eth sòn discors, Calbetó tanben arregraïc tàs dues equipes per “véner era nòsta tèrra, ath nivèu tan naut que la venetz”.
Er Ajuntament liurèc un medalhon hèt a man pera Associació Discapacitats d’Aran a cada membre des expedicions deth Badalona e deth Baskonia. Eth düèl s’enquadre laguens des hèstes majors deth municipi que finalizèren eth madeish dijaus dia 11.