Notícies Veir istoric
Er Ajuntament de Vielha e Mijaran a realizat trabalhs de neteja e mantenement des camins de montanha de diuèrsi pòbles deth municipi
Eth projècte, avalorat en 53.418,77 €, a comportat melhores enes camins vesiaus de Vielha, Casau, Gausac, Vilac e Casarilh, en tot amiar a tèrme sustot prètzhèts d’esbrancament e melhores en paviment e enes murs de pèira de contencion
Pendent aguesta primauera, er Ajuntament de Vielha e Mijaran a realizat un ample conjunt d’actuacions de melhora en mantenement e neteja de diuèrsi camins ruraus ath cant des pòbles deth municipi.
En aguest sens, eth consistòri a amiat a tèrme prètzhèts enes camins vesiaus des pòbles de Vielha, Casau, Gausac, Vilac e Casarilh, en un projècte avalorat en 53.418,77 €, a demana des Entitats Municipaus Descentralizades. Fòrça d’aguesti camins aué dia servissen entà accedir a finques en terrens rustics damb us agrari o ludic, e qu’es vesins e visitaires empleguen coma rotes entàs pedons en activitats esportives. Era intervencion s’a hèt damb er objectiu d’omogeneïzar toti es camins des nuclèus deth municipi, autant a nivèu d’infraestructures coma de materiaus d’acabats, en tot recuperar-les entàs emplecs actuaus.
En Vielha, s’a actuat enes camins de Sarrahèra, des Horques, Naviàs, Lejau e Riu Nere. Aquiu s’a netejat es paviments, en tot esbrancar era vegetacion, entà recuperar era traça des camins. S’an eliminat es pèires des camins, s’an format canalizacions d’aigua d’escorrentia entà evitar era erosion deth paviment, s’a catat era tèrra entà cercar era còta prevista dera explanada e s’a perfilat era basa deth paviment acabat.
En Casau, s’a actuat enes camins Ressec, Marrecs, Cap de Carrèr e en des de Peret damb er objectiu finau de poder realizar era sua urbanizacion integrau. Entà d’açò, s’a netejat eth paviment, en tot portar es tarcums ath tarcumèr autorizat, s’a catat era tèrra entà cercar era còta prevista dera explanada, en tot portar era tèrra ath tarcumèr autorizat e s’a perfilat era basa deth paviment d’acabat.
En Gausac, s’a intervengut en camin rurau d’accès ara zòna de Sovila. En aguest parçan, s’i trapen murs de maçoneria seca ath long deth camin entà contier es tèrres. Era manca d’emplec des prats d’aguest airau comportèc era manca de mantenement des murs, en tot supausar que diuèrsi trams s’an des·hèt parciaument. Per tant, s’an assolidat es murs entà evitar que s’estartalhen es camins e s’a netejat e esbrancat eth terren.
En Vilac, s’a actuat en camin que pòrte entà Betlan. S’a netejat e esbrancat, s’a catat era tèrra e s’a perfilat era basa per paviment d’acabat.
E, en Casarilh, s’a intervengut en camin disseminat. S’a aniveuat era tèrra e s’a compactat era esplanada. E tanben s’a assolidat es murs de pèira que supòrten es talhussi de tèrra, damb reposicion de pèires queigudes e era aplicacion de morter de ciment.
“Eth projècte de melhora des camins ruraus deth municipi ère ua actuacion plan de besonh, pr’amor que calie adaptar-les e deishar-les en bones condicions. Son camins que tradicionaument s’auien emplegat ena pagesia e, qu’ara, s’empleguen coma pas entà zònes de montanha e activitats esportives”, comente eth còsso de medi naturau e paisatge, Jacint Cuny. E ahig que “fòrça d’eri auien de besonh ua actuacion urgenta per estat deficient que presentauen e, d’aguesta manèra, les recuperam entàs naui emplecs que se li poguen balhar”.
14/07/2021