Notícies Veir istoric
Se suspen era Vielha Cycling Tour prevista entath 24 de junhsèga
Eth barrament indefinit deth Pòrt deth Portilhon pes autoritats franceses a obligat ara organizacion a adiar-la enquia 2022
Demore suspenuda era pròva ciclista Vielha Cycling Tour que s’aurie d’auer celebrat eth pròplèu 24 de junhsèga.
Deuant deth barrament indefinit deth Pòrt deth Portilhon decretat pes autoritats politiques franceses, era organizacion dera corsa s’a vist obligada a suspéner er eveniment, dempús de non auer podut trapar un recorregut alternatiu, pera proximitat dera data dera pròva.
Era Vielha Cycling Tour ei un eveniment organizat peth Club Ciclista Vielha, qu’ei compausat de dues distàncies: Era de Miei Hons, de 90 kms, damb era pujada as pòrts deth Plan Batalhèr, Pòrt deth Portilhon (2 viatges) e arribada en Vielha, e era Gran Hons, de 155 kms, damb es madeishi pòrts, e damb er ahijut deth Pòrt de Balès e eth Guardadèr d’Arres.
Est an passat ja s’auec d’adiar era sua estrea pr’amor dera aparicion dera pandémia dera COVID-19 e, fin finau, calerà demorar a 2022 entà estrear aguest nau eveniment esportiu.
Era organizacion aufrís era possibilitat as participaires de retornar eth prètz dera inscripcion enquiath 25 de junhsèga, o mantier era plaça entara sua celebracion en 2022.
12/07/2021