Notícies Veir istoric
Er Ajuntament de Vielha e Mijaran a començat aguesta setmana es trabalhs d’apariament dera estructura deth Palai de Gèu
Dempús d’auer aprovat era emergéncia dera òbra, s’a iniciat era prumèra fasa damb eth renfortiment des bigues e des pilars dera estructura, e se demore qu’en tres mesi poguen tornar ara normalitat es entitats damb servici ena planta baisha
Pendent aguesta setmana, er Ajuntament de Vielha e Mijaran a començat a desvolopar es trabalhs ena estructura deth Palai de Gèu de Vielha, que demore barrat ath public a compdar deth passat 26 de març per grèus desperfèctes ena pròpria estructura, qu’obliguèc ath sòn barrament immediat pera nauta perilhositat que i podie auer entàs usatgèrs.
Dempús de qu’eth consistòri declarèsse era emergéncia dera òbra, eth projècte aprovat ei compausat de dues fases: Ara s’a iniciat era prumèra fasa de reparacion, ena que se trabalhe en renfortiment des bigues e des pilars que sostien era estructura, pr’amor que i auie un naut perilh de que poguessen saturar-se e provocar bèth tipe d’esbauçament. S’amien a tèrme prètzhèts de sodatge des juntes des bigues, dempús se realizarà un cambi des avitzi que sostien precisament es bigues e tanben se substituiràn es planches que sostien es pilars dera madeisha estructura. Ei previst qu’aguesti trabalhs duren uns tres mesi, de manèra qu’en mes de seteme ja se poderà tornar ara normalitat ena planta baisha dera bastissa (a on balhen servici era Bibliotèca Generau de Vielha e d’autes entitats qu’an locaus).
Ena dusau fasa, se realizarà eth sanejament dera estructura ena zòna des piscines interiores e dera pista de gèu entà evitar que se pogue tornar a produsir bèth tipe de saturacion des bigues en futur. Ath delà, se realizaràn trabalhs de pentura, en tot trèir era pentura vielha e se tornarà a pintar dessús, damb er objectiu de que non se poguen tornar a rolhar. Aguesti trabalhs començaràn un viatge finalizada era prumèra fasa, de manèra qu’es servicis dera pista de gèu e des pròpries piscines plaçades ena prumèra planta dera bastissa seràn en foncionament, segontes es previsions, de cara ar inici der an 2022. Aguesta ei era data establida coma era tornada ara normalitat dera totalitat des activitats que s’amiauen a tèrme de manèra abituau en Palai de Gèu abans de conéisher es desperfèctes ena estructura.
“Ja auem començat es òbres de melhora dera estructura deth Palai de Gèu e demoram qu’es terminis qu’es tecnics mos an establit se poguen complir, e pòc a pòc pogam tornar era activitat dera installacion ara sua normalitat”, comente eth baile de Vielha e Mijaran, Juan Antonio Serrano. E ahig que “èm esperançadi en poder tornar a aufrir es servicis abituaus, autant des usatgèrs dera part esportiva coma des entitats qu’an locaus ena planta baisha. Entenem era preocupacion dera gent per saber quan poderàn tornar tath Palai, mès un viatge finalizadi es trabalhs, poderam tornar a gaudir dera installacion coma ère abituau e damb totau seguretat”.
10/06/2021