Notícies Veir istoric
Er equip de govèrn de Vielha e Mijaran s’amasse damb era organizacion dera Rodibook, en tot començar a premanir era 10au edicion, qu’enguan aurà lòc es dies 3 e 4 de seteme
Aguesta pròva non competitiva de mototorisme siguec era unica que se celebrèc en municipi est an passat pendent era pandémia, e enguan se demore era preséncia de lèu 1000 participaires, en tot generar un impacte economic ath torn des 300.000€
Vielha e Mijaran auance enes preparatius des desparières competicions e eveniments esportius que se celebraràn pendent aguest ostiu. Era melhora dera situacion dera pandémia dera COVID-19, arraïtz des desparières campanhes de vacunacion, facilite qu’enguan i pogue auer un calendari ample, en tot atrèir era preséncia de fòrça gent en municipi.
Aguest ei eth cas dera Rodibook, era pròva non competitiva de mototorisme, qu’enguan celebrarà ja era 10au edicion, e qu’a a Vielha coma punt de gessuda e d’arribada. Un eveniment fòrça important, qu’ei ja ua tradicion assolidada en municipi, qu’enguan aurà lòc es dies 3 e 4 de seteme, a on se demore que i pogue auer ath torn de 1000 participaires, que completen un recorregut pera Val d’Aran e es comarques der entorn.
Er equip de govèrn der Ajuntament de Vielha e Mijaran s’a amassat damb era direccion dera organizacion dera Rodibook entà començar a premanir era edicion d’enguan, que demore auer un impacte economic fòrça naut, peth dessús des 300.000€ en ua dimenjada, en tot beneficiar ath conjunt deth sector toristic deth municipi.
Era Rodibook mèrque cada an era fin des competicions e eveniments esportius multitudinaris en Vielha e Mijaran, en tot supausar ua grana promocion toristica qu’assolide eth mototorisme en municipi.
“Èm contènti de poder confirmar qu’enguan Vielha acuelherà era 10au edicion dera Rodibook, un eveniment assolidat en nòste municipi, e qu’ei er unic que se celebrèc en 2020 damb era aparicion dera COVID-19”, comente eth baile de Vielha e Mijaran, Juan Antonio Serrano. E ahig que “damb lèu 1000 participaires, ei un des plats fòrti d’aguest ostiu, en tot generar un impacte economic fòrça important en municipi, en tot dinamizar era economia e eth sector toristic en generau”.
02/06/2021