Notícies Veir istoric
Er Ajuntament arrecep ath CAI Zaragoza
Deluns passat 15 de seteme l’Ajuntament de Vielha e Mijaran arrecebec eth CAI Zaragoza qu’un aute an mès realize stage de pretemporada en Vielha. Eth club aragonés siguec arrecebut per part deth tinent baile Joaquín Puente, eth còsso de servicis Carlos Nart e eth còsso d’espòrts Agustin Calbetó.
Ena benvenguda ara equipa ACB, qu’auec lòc ena sala de plens der ajuntament aranés, sigueren presents toti es jogadors e membres dera expedicion aragonesa, es qu’arreceberen un detalh de part deth consistòri. Eth CAI demore ena Val d’Aran deth 14 ath 19 de seteme e aguesta ei era sua quatau visita as nòstes montanhes.
Eth tinent baile de Vielha e Mijaran, Joaquín Puente, declarèc que “un aute an mès vos dam era benvenguda e demoram que sigatz a gost, donques aciu tostemp auetz es pòrtes dubèrtes”.
Eth còsso d’espòrts, Agustin Calbetó, volec dar es “gràcies pera carta de supòrt que mos envièretz er an passat quan patirem es aiguats”. Tanben didec que “quan venguéretz er an passat, eth campanau ère en mau estat e sense crotz, mès l’auem recuperada e aguest acte de recuperacion e superacion ei fòrça important en espòrt, donques ei relacionat damb er esperit guanhador”. Fin finau, Calbetó ahigec “demori qu’aguesti dies pogatz gaudir des installacions e dera nòsta gent”.
Eth director esportiu deth CAI Zaragoza, d’autra banda, Willy Villar, volec “arregraïr eth ospitalitat, donques mos sentim coma ena nòsta casa e tant de bon pogam a tornar a vier mès ans”. Villar tanben transmetec un messatge deth extècnic José Luis Abós, qui auie estat pregoner des hèstes majors de Vielha e que deishèc era banqueta aragonesa per problèmes de salut: “Non a pogut vier mès vos arrebrembe fòrça e vos sauve molta estima”.