Notícies Veir istoric
Er Ajuntament de Vielha e Mijaran subvencionarà as familhes damb hilhs/es menors que participen enes casaus d’ostiu deth municipi
Eth consistòri sufragarà eth 50% dera activitat, ara que s’i pòden inscríuer es menors de Vielha e Mijaran, en tot ajudar as familhes a paliar ua part des efèctes dera crisi provocada pera pandémia dera COVID-19
Es familhes qu’an hilhs/es menors d’edat que participen enes casaus d’ostiu ja pòden demanar era ajuda extraordinària qu’aufrís er Ajuntament de Vielha e Mijaran.
Aguesta subvencion a coma objectiu ajudar as familhes a paliar es efèctes dera crisi economica derivada dera pandémia dera COVID-19. Era ajuda, que serà deth 50% deth còst, enquia un totau de 150€ per menor e activitat, servís entà finançar es despenes correntes dera participacion enes casaus d’ostiu que se realizen ena Val d’Aran pendent es mesi de junh, junhsèga e agost.
Entà optar a d’aguestes ajudes, s’auràn de complir coma mínim es següents requisits: Qu’eth menor, e coma minim un des pairs/mairs, siguen empadronadi en Vielha e Mijaran a dia 1 de gèr de 2021, qu’eth menor age mens de 18 ans, presentar era sollicitud laguens deth tèrme establit, qu’era familha non age cap deute tributari o d’aute tipe damb er Ajuntament de Vielha e Mijaran, e qu’es pairs/mairs siguen ath corrent deth pagament des obligacions tributàries e dera Seguretat Sociau.
Es sollicitants non poderàn superar era renda d’unitat familhara. Es familhes de dus membres non poderàn superar es 23.212,20€, es familhes de tres membres auràn un limit de 30.482,10€, es familhes de quate membres 36.157€ e es familhes de cinc membres 41.031,10€. A compdar des sies membres se higerà 3.610,20€ per cada nau membre computable. Eth volum maxim d’ingrèssi non poderà excedir de 155.000€ entre toti es membres dera unitat familhara e eth rendiment de patrimòni se limitarà a 1700€.
Es sollicituds se presentaràn en modèl normalizat que figure coma Annèx I d’aguesta convocatòria en Registre der Ajuntament, o per quinsevolhe des mejans admetudi en procediment administratiu, pendent es quinze (15) dies abils següents ara sua publicacion en Bulletin Oficiau dera Província de Lhèida; tanben se publicarà en taulèr d’anóncis municipaus e ena plana web der Ajuntament de Vielha e Mijaran, www.vielha-mijaran.org.
Ena presentacion dera demana, s’aurà de liurar era sollicitud segons eth modèl normalizat, damb donades e signatura deth demanant e deth menor, presentacion d’ua fotocòpia deth pair/mair/tutor legau, e en cas de demanants estràngers se poderà presentar eth NIE, eth permís de residéncia o passapòrt. Tanben serà de besonh presentar era declaracion dera renda de 2019 e es donades deth compde bancari e eth titular deth madeish.
Er airau de Secretaria avalorarà es sollicituds, e eth listat definitiu serà aprovat pera Junta de Govèrn. Es sollicituds aprovades seràn publicades en taulèr d’Edictes Municipaus e es denegades seràn notificades individuaument.
“Des der Ajuntament de Vielha e Mijaran seguim en tot ajudar as familhes que s’an vist afectades pera pandémia dera COVID-19, en aguest cas damb era subvencion deth 50% deth còst dera participacion des menors enes casaus d’ostiu deth municipi”, comente eth baile de Vielha e Mijaran, Juan Antonio Serrano. E ahig que “enes pròplèu dies se publicarà aguesta ajuda en Bulletin Oficiau dera Província de Lhèida, de manèra qu’es interessadi/es, ja pòden inscríuer as sòns/sues hilhs/es enes casaus, damb era tranquillitat de saber que receberàn ua importanta ajuda“.
28/05/2021