Notícies Veir istoric
Eth Plen der Ajuntament de Vielha e Mijaran apròve trabalhar ena flexibilizacion dera normativa sus era implantacion de granges en municipi
Es actuaus normatives urbanistiques dificulten eth desvolopament ordinari d’aguest tipe d’activitat autant en solèr urbanizable coma non urbanizable, de manèra que s’estudiarà suavizar es minims entà poder bastir granges
Eth Plen der Ajuntament de Vielha e Mijaran, amassat en session ordinària, a aprovat aguest maitin era suspension potestatiua de tramitacions e abilitacions administratives entara implantacion de naues granges en solèr urbanizable e non urbanizable en municipi, peth termini d’un an.
Damb aguesta decision, aprovada damb es vòts a favor d’Unitat d’Aran e era abstencion dera oposicion de Convergéncia Aranesa e Aran-Amassa, es grups municipaus an acordat començar a trabalhar ena flexibilizacion dera normativa actuau, qu’ei fòrça restrictiva e que dificulte eth normau desvolopament d’aguesta activitat economica en Vielha e Mijaran.
Actuaument, es normes urbanistiques, reflectides enes normes subsidiàries, establissen qu’es finques an d’auer un minim de 5000m2 de terren, qu’an d’auer un camin existent entà accedir-i e damb ua separacion de 25 mètres des carretères e des arrius. Molt pòques finques en solèr rustic de Vielha e Mijaran complissen amb aguesti paramètres, de manèra que hè dificil era implantacion de naues granges.
Era decision dera suspension des licéncies per un an, s’acòrde precisament entà poder estudiar coma establir ua normativa mejana, que pogue suavizar es restriccions actuaus, entà facilitar qu’era gent pogue auer granges enes finques que dispòse eth municipi damb es caracteristiques existentes. Atau madeish, tanben se poirà balhar responsa as activitats agropecuàries menors coma pòden èster es garières o auer petites explotacions de oelhes, crabes, eca.
Atau madeish, eth Plen a aprovat per unanimitat era declaracion coma Ben Culturau d’Interés Locau dera Casa deth Senhor d’Arròs, de titolaritat dera EMD d’Arròs e Vila, entà qu’aguesta pogue realizar melhores e d’autes actuacions avientes ena finca. Aguesta bastissa a un gran valor patrimoniau e culturau, pr’amor qu’ei era actuau sedença der Archiu Generau d’Aran e des Plens deth Conselh Generau d’Aran, e qu’en 2020 ven de celebrar eth sòn bicentenari.
“Des der Ajuntament credem qu’ei de besonh era modificacion dera normativa actuau d’implantacion de granges en municipi, pr’amor qu’ei fòrça restrictiva”, comente eth baile de Vielha e Mijaran, Juan Antonio Serrano. E ahig que ”es normes son obsoletes, les cau adaptar as tempsi actuaus, e per aquerò trabalharam ena flexibilizacion des normatives, entà qu’era gent pogue auer mès facilitats ara ora de poder iniciar-se en aguesta activitat economica”.
26/05/2021