Notícies Veir istoric
Er Ajuntament de Vielha e Mijaran e era Associacion d’Artistes e Artesans d’Aran impulsen eth mercat artesanau Vielha Market
Aguesta iniciativa, que prebotge eth trabalh artesanau e promò era activitat economica deth municipi, s’iniciarà aguest pròplèu dimenge, e se desvoloparà pendent tot er ostiu ena plaça dera glèisa, des 10 as 13 ores
A compdar d’aguest pròplèu dimenge 30 de mai nèish Vielha Market, un nau mercat artesanau que preten impulsar eth trabalh des artesans dera Val d’Aran, e promòir era activitat economica de Vielha e Mijaran pendent toti es dimenges enquia qu’acabe er ostiu.
Aguesta iniciativa ei eth resultat d’un acòrd entre er Ajuntament de Vielha e Mijaran e era Associacion d’Artistes e Artesans d’Aran. Es visitaires poiràn gaudir des productes des desparièrs artesans pendent toti es dimenges d’aguesta primauera e der ostiu en orari des 10 as 13 ores, enes paradetes que seràn plaçades ena plaça dera glèisa de Vielha.
“Des der Ajuntament de Vielha e Mijaran credem qu’ei fonamentau balhar visibilitat ath trabalh que hèn es nòsti artesans. Un trabalh que supause un gran esfòrç as sòns productors e, qu’ath delà, servirà entà dinamizar era activitat economica pendent es dimenges d’aguest ostiu en nòste municipi, a on se demore que i age ua nauta preséncia de visitaires”, comente eth baile de Vielha e Mijaran, Juan Antonio Serrano.