Notícies Veir istoric
Vielha e Mijaran s’aderís ath Pacte contra era segregacion escolara en Catalonha prebotjada peth Departament d’Educacion dera Generalitat e peth Síndic de Greuges
Damb aguesta iniciativa se preten assegurar era igualtat d’oportunitats en dret ara educacion, en tot reflectir era barreja sociau que i a en territòri
Er Ajuntament de Vielha e Mijaran a acordat era sua adesion ath Pacte contra era segregacion escolara en Catalonha, en ua iniciativa prebotjada peth Departament d’Educacion dera Generalitat de Catalunya e peth Síndic de Greuges.
Aguesta adesion respon ara volentat de favorir qu’es municipis de mens de 10.000 abitants se somen ara iniciativa, en tot hèr-les actors actius dera luta contra era segregacion escolara. En aguest sens, er objectiu ei velhar per ua composicion sociau enes centres escolars equivalenta ara barreja existenta en territòri.
Eth Pacte vò plaçar era segregacion escolara en centre dera agenda dera politica educativa e promòir consensi ath torn des mesures que cau implementar. I a previsti 9 airaus d’actuacion, 30 actuacions e 189 mesures a desvolopar pes desparières entitats que signen eth Pacte en periòde 2019-2023.
D’aguesta manèra, eth consistòri se compromet a aplicar es mesures includides en Pacte, en marc des competéncies des quau dispòsen en airau dera planificacion educativa, atau coma participar des amassades de seguiment deth madeish quan i agen aspèctes restacadi damb er airau competenciau des administracions locaus o damb eth pròpri municipi.
04/05/2021