Notícies Veir istoric
Eth baile de Vielha e Mijaran, Juan Antonio Serrano, presente as vesins deth casc antic de Vielha, eth projècte de melhora deth hilat d’aigua, sanejament e pavimentacion qu’eth consistòri realizarà aguest ostiu
En aguesta exposicion s’a parlat sus eth besonh de modernizar aguesti servicis en un conjunt de carrèrs que hè mès de 50 ans que non an estat reformadi, damb ua inversion de mès de 350.000€
Pendent aguesta setmana, eth baile de Vielha e Mijaran, Juan Antonio Serrano, a presentat as vesins/ies des carrèrs deth casc antic de Vielha, es òbres qu’eth consistòri realizarà aguest ostiu entà apariar e modernizar eth hilat d’aigua, sanejament e pavimentacion.
Aguesta intervencion, que s’amiarà a tèrme enes carrèrs que confluïssen damb eth carrèr Major e ena carretèra de Gausac, compde damb un pressupòst de 357.554,01 €. Ua actuacion plan de besonh, pr’amor que hè mès de 50 ans que non s’an hèt melhores en aguesti servicis e a on es carrèrs presenten un acabat de hormigon fòrça deteriorat o damb un godron qu’a patit fòrça reparacions ath long des ans e, en conseqüéncia, presenten irregularitats, henerècles e deteriorament pera retirada dera nhèu e pes cambis de temperatura en iuèrn.
Es òbres s’an includit laguens dera 2au modificacion de credit deth pressupòst municipau d’enguan aprovat aguest passat dimèrcles en plen extraordinari, damb es vòts a favor d’Unitat d’Aran e es vòts en contra des partits dera oposicion: Convergéncia Aranesa e Aran-Amassa.
“En aguesta presentacion auem volut qu’es pròpris/ies vesins/ies poguessen conéisher prigondament eth projècte de melhora des carrèrs que seràn intervengudi aguest ostiu, e que poguessen preguntar tot tipe de dubtes sus es òbres”, comente eth baile de Vielha e Mijaran, Juan Antonio Serrano. E ahig que “supausarà ua melhora importanta que modernizarà es servicis basics en aguest endret de Vielha, a on hè mès de 50 ans que non se i a hèt cap tipe d’intervencion d’aguesta magnitud”.