Notícies Veir istoric
Vielha e Mijaran met en foncionament un conjunt de sessions de Marcha Nordica damb activitat es dimars des 16:00 as 17:30
Aguest nau grup, nomentat Vielha Healthy Plus, se realizarà deth 6 d’abriu ar 11 de mai, damb er objectiu qu’era gent s’inície en mon dera Marcha Nordica damb ua intensitat baisha e recorreguts cuerti
A compdar d’aguest dimars, 6 d’abriu, er Ajuntament de Vielha e Mijaran met en foncionament un seguit de sessions provisionaus de Marcha Nordica, nomentat Vielha Healthy Plus. Aguest grup aurà activitat es dimars des 16:00 as 17:30, e s’amiarà a tèrme enquiath pròplèu 11 de mai.
Aguesta activitat ei dirigida a tota aquera gent que volgue començar a hèr exercici de manèra suau, per iniciativa pròpria o per prescripcion medica. Es recorreguts seràn cuerti pes entorns de Vielha d’enquia 4 kms e damb un desnivèu minim, damb un ritme totaument adaptat ath perfil de grup. Er objectiu finau ei qu’era gent s’abitue a hèr aguest espòrt, en tot contunhar damb quauqu’ua des gessudes fixes de Marcha Nordica establides en calendari.
Ath delà des sessions deth Vielha Healthy Plus (qu’ei provisionau), Vielha e Mijaran manten enguan 3 grups de gessudes: Eth grup Healthy, que se realize es dimars e dijaus de 18:00 a 20:00. Eth grup Social, damb activitat es dissabtes de 09:30 a 13:30 e, fin finau, eth grup Sportive, que s’amie a tèrme es deluns des 18:00 as 21:00.
“Aguest ei eth 6au an de foncionament d’aguesta activitat qu’a estat tot un exit en territòri e a agut ua molt bona acuelhuda per part dera ciutadania, coma un servici de léser que fomente era practica esportiua entre diuèrsi collectius dera poblacion”, comente eth 2au tinent d’alcalde e còsso d’espòrts de Vielha e Mijaran, Alberto López. E ahig que “damb aguestes naues sessions volem fomentar que mès gent pogue iniciar-se ena practica dera Marcha Nordica en municipi, en tot cercar que s’adapten pòc a pòc a hèr gessudes mès longues e que requerissen un esfòrç fisic mès naut, que conformen es grups Healthy, Social e Sportive, ja fixes en calendari annau”.