Notícies Veir istoric
Er equip de govèrn de Vielha e Mijaran s’amasse damb Caritas Val d’Aran entà seguir en tot collaborar en ajudar as familhes mès vulnerables deth municipi
Ena amassada s’a analizat era aportacion economica qu’eth consistòri hec en 2020, s’a tractat quini son es besonhs qu’era associacion a entà enguan, e se lis a liurat masquètes de proteccion dera COVID-19 destinades ara ciutadania en risc
Er equip de govèrn de Vielha e Mijaran
s’a amassat damb representants de Caritas Val d’Aran, damb er objectiu de
seguir en tot ajudar as familhes en risc d’exclusion sociau deth municipi,
qu’an aumentat a conseqüéncia dera crisi qu’a causat era pandémia dera
COVID-19.
En aguest sens, eth consistòri destinèc
est an passat 10.000€ as familhes vulnerables, entà ajudar-les a pagar eth
loguèr, es subministraments des larèrs e aliments frèsqui. En totau, aguesta
partida servic entà ajudar a 26 familhes damb un totau de 78 beneficiaris en 50
ajudes dirèctes.
Ena amassada s’analisèc e se dèc
seguiment precisament ad aguesta intervencion, e se tractèren es besonhs que
Caritas Val d’Aran a entà enguan, en tot estudiar de quina manèra pòt mantier
eth consistòri era sua collaboracion damb era entitat solidària.
Ath delà, er Ajuntament de Vielha e
Mijaran aufric un lòt de masquètes entà qu’era entitat pogue repartir entre
toti/es aqueri/aqueres vesins/ies qu’agen mès dificultats economiques.
“Er objectiu der equip de govèrn ei
mantier era collaboracion damb Caritas Val d’Aran entà suenhar e ajudar ara
ciutadania mès vulnerable deth municipi, qu’a aumentat pera crisi provocada
pera pandémia dera COVID-19”,
comente eth baile de Vielha e Mijaran, Juan Antonio Serrano. E ahig que “valoram
fòrça positivament era intervencion d’est an passat e, amassa damb Caritas Val
d’Aran, cercam seguir ena linha d’aufrir mès ajudes laguens des nòstes
possibilitats, entà paliar es efèctes d’aguesta crisi, e pòc a pòc tornar a ua
cèrta normalitat”.