Notícies Veir istoric
Se constituís era taula der abitatge de Vielha e Mijaran damb era participacion des desparièrs grups municipaus
Ena prumèra reunion s’a analizat era situacion deth parc immobiliari de viuendes de loguèr e dera problematica en accès ara viuenda en territòri, en tot remercar es accions que des der Ajuntament de Vielha e Mijaran s’an realizat
Vielha e Mijaran a constituït formaument era mesa der abitatge, ena que i prenen part es desparièrs grups municipaus (Unitat d’Aran, Convergéncia Aranesa e Aran-Amassa) e era secretaria e er arquitècte municipau.
Er objectiu d’aguesta taula ei qu’es desparières formacions politiques dera institucion tracten sus era problematica qu’existís ath torn dera viuenda, sustot en sòn accès per part de fòrça sectors dera societat.
En aguesta prumèra reunion (ara que non assistic eth representant deth grup Aran-Amassa), er equip de govèrn d’Unitat d’Aran informèc sus er estat actuau dera viuenda sociau en municipi, en tot hèr enfasi ena possibilitat de cedir es terrens publics que dispause eth consistòri, precisament, coma espacis entà poder bastir abitatges sociaus de loguèr entà tota aquera gent qu’age dificultat entà arténher ua viuenda.
En aguest sens, se manifestèc era clara volontat der equip de govèrn en sajar de cedir desparièrs terrens entà d’aguesta finalitat. Un d’aguesti terrens mès factibles que i a en municipi ei plaçat ath cant d’Era Audiovisuau de Vielha, a on se trapaue era antiga pista de fronton, e que compde damb un espaci verd, ath cant deth carrèr Anglada. Un terren qu’ère bloquejat des de 2006 per INCASOL (Institut Català del Sól), qu’ei un organisme creat pera Generalitat de Catalunya entà gestionar totes es matèries d’urbanisme dera sua competéncia, coma resultat d’un convèni damb eth consistòri. En 2018, eth baile de Vielha e Mijaran, Juan Antonio Serrano, reclamèc ar INCASOL era devolucion d’aguesta superfícia, que s’a hèt efectiua en mes de gèr d’enguan en favor der Ajuntament de Vielha e Mijaran, e qu’ei a on mès possibilitats i a de prebotjar eth bastiment d’abitatge sociau. En tot cas, er Ajuntament balharà supòrt as possibles iniciatiues que poguen aparéisher, en tot collaborar laguens des possibilitats existentes.
En tot aguest procediment ei de besonh rebrembar qu’era competéncia en airau dera viuenda sociau ei atribuïda e desvolopada pes comunitats autonòmes. Per tant, en Catalonha ei era Generalitat qui a era responsabilitat deth sòn foment e promocion. Eth consistòri a sajat de cedir fòrça viatges es sòns terrens ara Generalitat entà que pogue bastir viuendes sociaus, mès en Vielha e Mijaran hè mès de dètz ans que non n’a bastit cap. Deuant dera inactivitat dera administracion catalana en aguest ahèr, er Ajuntament de Vielha e Mijaran ei qui a prenut era decision de trabalhar entà poder cedir es terrens dera sua titolaritat entà trapar solucions a d’aguesta problematica.
“Aguesta prumèra amassada damb era oposicion a estat fòrça profitosa, pr’amor qu’aguesta taula mos permeterà poder debàter e tractar, conjuntament, un problèma fòrça estenut ena ciutadania, coma ei er accès a ua viuenda, en aguest cas de caire sociau, e que mos pertòque a toti”, comente eth baile de Vielha e Mijaran, Juan Antonio Serrano. E ahig que “des der Ajuntament de Vielha e Mijaran portam diuèrsi ans en tot trabalhar entà poder facilitar era cession de terren public entath bastiment de viuenda sociau en municipi. Atau madeish, auem prenut mesures coma eth contròl dera proliferacion des abitatges d’ús toristic, a trauès dera sua regulacion, entà facilitar qu’era gent pogue accedir a auer ua viuenda digna”.
19/02/2021