Notícies Veir istoric
‘Eth Holet’ arribe en Vielha e Mijaran
Entà descurbir es secrèts deth sòn entorn naturau e aquatic
Deluns 22 de deseme s’a presentat era aplicacion multimèdia ‘Eth Holet’ ena sala Era Audiovisuau de Vielha dera man deth baile Vielha e Mijaran, Alex Moga e deth scientific deth CSIC Lluís Camarero. Aguesta app s’a desvolopat laguens deth programa Sud’Eau 2 entà hèr préner consciéncia ara poblacion sus era importància des mieis aquatics.
En prumèr lòc, Alex Moga a contextualizat era aplicacion: “Aguesta app conten sies itineraris guidadi per GPS e ei era prumèra que se hè d’aguest estil ena Val d’Aran”. “Eth resultat finau ei fòrça professionau e entre toti la haram a créisher entà sigue un referent e util entàs senderistes, e tanben entà hèr conéisher entre eth public generau punts d’interès deth miei naturau deth nòste municipi”, a apuntat eth baile.
Ara seguida, Lluís Camarero hec ua analisi exaustiva dera app. Guidadi a trauèrs d’Eth Holet, un personatge dera mitologia aranesa, era aplicacion multiplataforma (Android, IOS –aguest disponible laguens d’un mes– e HTML5) mos condusís ath long de disparièrs itineraris der entorn naturau e der auviatge aquatic de Vielha e Mijaran e dera Val d’Aran.
Cau destacar qu’ei un estrument de conscienciacion ambientau que promò era participacion dera ciutadania a trauèrs d’un menu fòrça intuïtiu e tanben a trauèrs dera sua plana web (http://holet.org/oc/). Ath delà, se pòden crear naui itineraris e includir-les per miei d’usatgèrs autorizadi.
Aguest eveniment se tròbe laguens deth marc deth projècte Sud’Eau 2 e preten hèr préner consciéncia ara ciutadania sus era importància dera preservacion dera aigua e es arrius.