Notícies Veir istoric
Vielha e Mijaran arrecep eth libre “Netó: Era legenda der Aneto”, qu’ei publicat en aranés, benasqués e occitan, coma accion includida laguens deth projècte Interreg-POCTEFA “Reiaume der Aneto”
Damb aguesta publicacion se met en valor era cultura orau, era lengua, en tot supausar ua cooperacion entre es territòris que i participen: Benasc, Luishon e Vielha e Mijaran
Er Ajuntament de Vielha e Mijaran a arrecebut aguesta setmana eth libre “Netó: Era legenda der Aneto”, que tracte sus ua legenda qu’a ara montanha pirenenca coma èish vertebrador dera istòria. Aguesta accion ei includida laguens deth projècte Interreg-POCTEFA “Reiaume der Aneto” en qu’i participen Benasc, Luishon e Vielha e Mijaran. En aguest sens, eth libre s’a editat en benasqués, occitan e aranés, coma mòstra de respècte as lengües oficiaus des diuèrsi sòcis deth projècte, en tot promòir era sua difusion.
En çò que tanh ara publicacion deth tèxte en aranés, aguesta a estat amiada a tèrme peth departament de politica lingüistica deth Conselh Generau d’Aran.
Er objectiu d’aguesta publicacion ei méter en valor diuèrsi aspèctes qu’an en comun es diuèrsi territòris. Per un costat, coma territòris pirenencs transfronterèrs, que compartissen ua similitud orografica e ua manèra semblanta de víuer. Atau madeish, se met en valor era cultura orau (a trauès d’ua legenda) e era lengua oficiau de cadun des territòris que prenen part deth projècte, que son minoritàries, e que s’an de suenhar e promòir (benasqués, occitan e aranés). E, fin finau, se remèrque er esperit de cooperacion entre es tres sòcis en tot trabalhar amassa en projècte Interreg-POCTEFA de difusion des sòns territòris.
Es exemplars d’aguest libre seràn repartidi entre er alumnat dera Escòla Garona de Vielha.
“Èm fòrça satisfèts de poder compdar damb aguest libre, qu’ei revirat en aranés, coma mòstra de cooperacion e de respècte pera singularitat des diuèrsi territòris que hèm part deth projècte Interreg-POCTEFA”, comente eth dusau tinent d’alcalde e còsso d’ensenhament e joenessa de Vielha e Mijaran, Alberto López.