Notícies Veir istoric
Er Ajuntament de Vielha e Mijaran substituirà era impermeabilizacion e melhorarà er acabat dera piscina petita deth Palai de Gèu
Damb aguesta intervencion s’eliminarà era aparicion de contínues filtracions d’aigua que cause eth vas ena planta inferiora, localizades en vestiari femenin
Er Ajuntament de Vielha e Mijaran a adjudicat era licitacion entà realizar trabalhs de melhora en servici des piscines interiores deth Palai de Gèu. En aguest cas, era intervencion s’amiarà a tèrme ena piscina petita, en tot realizar un cambi dera impermeabilizacion.
S’a detectat que i a fòrça deficiéncies en aguest aspècte, qu’a provocat contínues filtracions d’aigua ena planta inferiora dera installacion, en tot afectar, sustot, eth vestiari femenin. Era substitucion dera impermeabilizacion ei urgenta e de besonh, pr’amor qu’ei era unica solucion avienta entà poder acabar damb aguest grèu problèma.
En tot profitar aguesta intervencion, tanben se realizarà ua melhora en acabat dera piscina, entà que sigue mès trendre ath tacte des usatgèrs, en tot plaçar-i ua prumèra capa de tipe Foam especiau entà piscines, dessús s’i plaçarà ua dusau capa geotextil de polièster anti microorganismes e, fin finau, eth revestiment se realizarà damb ua manta flexibla de PVC armada, damb un acabat antibacterian entà esvitar hongs.
Era execucion d’aguesta intervencion compde damb un pressupòst finau de 24.847,31€.
“Damb aguesta intervencion refortilham era importància de mantier en bon estat es installacions deth Palai de Gèu, coma principau installacion esportiua municipau e dera Val d’Aran”, comente eth 2au tinent d’alcalde e còsso d’espòrts de Vielha e Mijaran, Alberto López. E ahig que “seguim en tot trabalhar ena elaboracion d’un plan de melhores entà enguan, que permeterà cambiar era imatge dera installacion e garantir era sua viabilitat entàs pròplèu ans, en tot melhorar er equipament e es sòns servicis”.
22/01/2021