Notícies Veir istoric
Vielha e Mijaran daurís eth pròplèu 23 de Noveme es installacions municipaus, en tot adaptar eth sòn foncionament ath plan de desescalada decretat pera Generalitat
En aguest prumèr tram, es equipaments culturaus dauriràn ath 50% d’aforament, mentre qu’es esportius ac haràn ath 30%, en tot demanar cita prealabla e sense emplegar eth vestiari, a exceptat des piscines deth Palai de Gèu
Aguest pròplèu deluns 23 de Noveme, en tot coincidir damb era prumèra des quate fases de desescalada decretades pera Generalitat de Catalunya, tornen a daurir-se es equipaments municipaus de Vielha e Mijaran, en tot adaptar eth sòn foncionament ordinari as directritzes que son vigentes.
Aguest prumèr tram, que finalizarà eth 6 de deseme, permet qu’es equipaments esportius daurisquen ath 30% d’aforament. En aguest sens, en Palai de Gèu s’aplique aguesta restriccion d’aforament enes desparièrs espacis, en tot auer de demanar cita prealabla e sense emplegar es vestiaris (a exceptat des usatgèrs des piscines). En aguest equipament se reprenen es activitats dirigides e es corsets esportius, en tot complir damb era limitacion d’aforament. En Centre Polivalent e en Palai d’Espòrts tanben i aurà un 30% d’aforament e s’aurà de sollicitar eth sòn emplec damb cita prealabla.
En çò que tanh ara rèsta d’equipaments esportius (padel, fronton e skate park) er aforament demore limitat a un maxim deth 50% dera sua capacitat. Mentre, qu’era rèsta d’activitats ar aire liure, ja siguen esportiues (per exemple: Marcha Nordica) o sociaus, i poderà auer un maxim de 6 persones.
En airau culturau, era preséncia d’usatgèrs demore restringida a un maxim deth 50% enes installacions. Era Bibliotèca Generau de Vielha daurirà en sòn orari abituau damb aguesta limitacion, en tot perméter es activitats de lectura e estudi, atau coma eth servici de prèst. Pera sua part, Era Audiovisuau tornarà a daurir es sues pòrtes eth 28 de Noveme, damb sessions es dissabtes e dimenges (entàs 17:15 e 19:15) e es deluns (19:15) damb era madeisha limitacion d’aforament.
Atau madeish, era mainadèra poderà tornar a emplegar es parcs infantils municipaus, en tot finalizar eth sòn servici entàs 20 ores, coma s’auie amiat a tèrme abantes deth sòn barrament.
Era Generalitat de Catalunya a abilitat un totau de 4 fases de desescalada qu’anaràn en tot cambiar cada quinze dies, se tot va ben, entà controlar er aument des contagis dera COVID-19. Ei previst qu’era darrèra fasa acabe eth 16 de gèr de 2021.
Pendent tot aguest periòde de desescalada se manten eth tòc de queda nocturn establit entre es 22 ores dera net e es 6 ores dera maitiada.