Notícies Veir istoric
Er Ajuntament de Vielha e Mijaran trebalhe ena redaccion deth plan d’inversions, remodelacion e melhores deth Palai de Gèu entath 2021
Er equip de govèrn balhe as partits dera Corporacion es inversions destinades en pressupòst de 2020 avalorades en mès de 150.000€ e es actuacions previstes entà 2021
Er equip de govèrn municipau s’a amassat aguest dijaus pera tarde damb es desparièrs partits politics dera Corporacion de Vielha e Mijaran entà parlar sus era situacion que viu eth Palai de Gèu, en tot seguir ua linha de reunions iniciada aguest passat ostiu. Aguesta amassada, programada hè ues setmanes, sage d’èster un mecanisme de transparéncia sus er estat deth principau equipament municipau, e que compde damb eth compromís de celebrar-se periodicament.
En aguesta amassada, s’a balhat informacion sus es trabalhs e es inversions de mantenement que s’an amiat a tèrme en equipament municipau pendent es darrèri ans. En aguest sens, entre 2018 e 2020 eth consistòri a implementat inversions de mès de 270.000 € entà suenhar eth bon estat des desparièrs espacis (pista de gèu, piscines, gimnàs, sala e rocodrom).
Des des sòns inicis, hè mès de 25 ans, eth Palai de Gèu ei ua installacion que compde damb un deficit estructuau, e que supause ua fòrta despena per part deth consistòri. Eth 20% dera inversion annau der Ajuntament de Vielha e Mijaran en airau d’espòrt va dirigit ath mantenement deth Palai de Gèu.
Precisament, deuant era nauta despena economica que requerís eth mantenement der equipament, er equip de govèrn a artenhut era implicacion d’autes administracions politiques, coma era Diputació de Lleida, que collabòre damb ua inversion fixa de 100.000€, e era participacion deth Conselh Generau d’Aran. Atau madeish, seguís en negociacions damb era Generalitat de Catalunya, entà acabar de barrar un acòrd de collaboracion annau, qu’ajudarie, e fòrça, ena subervivença dera installacion, pr’amor qu’ei de besonh era implicacion des administracions publiques de diuèrsi nivèus.
“Toti/es coneishem era realitat deth Palai de Gèu des des sòns inicis, e eth gran esfòrç economic qu’amie a tèrme er Ajuntament de Vielha e Mijaran en sòn mantenement. Enguan e en 2021, damb era supression des règles fiscaus, poderam implementar ua despena importanta entà desvolopar era remodelacion e reforma de bona part dera installacion e deishar-la enes melhores condicions possibles”, comente eth baile de Vielha e Mijaran, Juan Antonio Serrano. E ahig que “portam temps en negociacions damb era Secretaria Generau der Espòrt dera Generalitat de Catalunya entà arténher era sua collaboracion dirècta e implicacion en mantenement d’aguesta installacion, qu’amassa damb es 100.000€ qu’apòrte annuament era Diputació de Lleida, ajudarien economicament ar equipament esportiu que da servici as aranesi, mès tanben ara gent que ven de dehòra”.
19/11/2020