Notícies Veir istoric
Rodrigo González Dávila analise er estat dera pesca ena Val d’Aran
En ua conferéncia ena Societat de Caça e Pesca Val d’Aran
Eth dimèrcles 17 de deseme debanèc un ‘Taller de Pesca’ dera man de Rodrigo González Dávila, secretari dera Federació Catalana de Pesca Esportiva i Càsting, ena sedença dera Societat de Caça e Pesca Val d’Aran plaçada enes installacions deth Palai de Gèu de Vielha, en ua des darrères activitats deth projècte Sud’Eau 2 entà hèr préner consciéncia sus era importància des mieis aquatics.
Era charrada, que compdèc damb membres dera Societat de Caça e Pesca Val d’Aran e dera Societat de Caça e Pesca Naut Aran, comencèc en tot tractar es efèctes des aiguats deth 18 de junh de 2013 e es sues òbres posteriores ena pesca. González analisèc que i aurà un nau començament dera pesca ena Val d’Aran e er arriu se repoblarà de peishi.
Arran des aiguats, s’an agilizat es tramits entà actuar en arriu. Se pòden realizar accions menors sense hèr barbaritats entara conservacion deth domeni public idraulic, segontes indique eth BOE deth 1 de març de 2014.
Tanben s’estudièc es naui mestièrs relacionadi damb er arriu coma es guides de pesca. Se tracte d’enterpreses qu’organizen itineraris guidadi e acompanhen a clients estrangèrs pes païsatges aquatics deth Pirenèu entara practica dera pesca, generauments sense mòrt. Aguesta activitat ara longa se pòt convertir en ua profession reglada. Un aute des tèmes claus ei era creacion d’un mapa d’espècies en arriu entà catalogar es animaus deth Garona e atau atrèir a pescaires de tot eth mon.
Fin finau, s’analisèren er auanç d’espècies invasores coma era alga ‘moc de ròca’ que s’apròpe progressiuaments ara Val d’Aran e resulte fòrça perjudiciau enes ecosistèmes aquatics.