Notícies Veir istoric
Vielha e Mijaran s’ahig ara mocion deth Conselh Generau d’Aran tà demanar ara Generalitat ua melhora en finançament deth sistèma sanitari aranés
En plen ordinari celebrat aguest maitin tanben s’a hèt un rebrembe ara figura de José Calbetó, que siguec baile de Vielha e Mijaran pendent 1987-1999 e de 2007 a 2009, que moric era passada setmana
Aguest
maitin, eth
plen der Ajuntament de Vielha e Mijaran, amassat en session ordinària, a
aprovat era mocion qu’eth Conselh Generau d’Aran aprovèc tanben en plen eth
passat 31 de junhsèga, entà reclamar ara Generalitat de Catalunya qu’amie a
tèrme ua melhora urgenta deth finançament deth sistèma sanitari e de salut dera
Val d’Aran.
Aguesta
mocion en Vielha e Mijaran a compdat damb es vòts a favor d’Unitat d’Aran e
Convergéncia Aranesa, e era abstencion d’Aran Amassa. Era mocion demòstre que, pendent es ans 2011 e 2019, s’a
establit un deficit annau grèu en pressupòst destinat ar airau sanitari aranés.
Cada an, aguest deficit supère eth milion d’èuros, en tot hèr de besonh que i
age ua reversion d’aguesta situacion entà melhorar eth foncionament ordinari
dera sanitat ena Val d’Aran. Cau rebrembar qu’eth Conselh Generau d’Aran a
transferides es competéncies en sanitat des de 2001.
Ath
delà, pendent era celebracion deth plen, es diuèrsi grups municipaus an hèt un
rebrembe sus era figura de José
‘Pepito’ Calbetó, que moric era passada setmana, e
que siguec baile de Vielha e Mijaran pendent 14 ans (entre 1987 e 1999 e de
2007 a 2009).
30/09/2020