Notícies Veir istoric
Vielha e Mijaran cedís es installacions esportives municipaus ar INS d’Aran pendent eth cors escolar
Er equip de govèrn s’a amassat damb es directius deth centre e des cicles formatius entà coordinar er accès e er emplec des equipaments, en tot aplicar eth protocòu aprovat peth consistòri damb motiu dera COVID-19
Er
alumnat der INS d’Aran poderà emplegar es installacions esportives municipaus
(Palai d’Espòrts e Centre Polivalent)
entath nau cors escolar 2020/21 dempús de qu’er Ajuntament de Vielha e Mijaran
age cedit eth sòn emplec.
Er
equip de govèrn municipau e era direccion der INS d’Aran, atau coma des cicles
formatius, s’an amassat entà coordinar coma s’a d’amiar a tèrme er accès e er
emplec d’aguesti equipaments. Entà gestiona’c, s’aurà d’aplicar eth protocòu
vigent aprovat peth consistòri, e qu’a estat presentat ara direccion deth
centre, entà previer eth risc de contagi dera COVID-19 abantes, pendent e
dempús dera practica esportiva en aguestes installacions. Un emplec que demane
era responsabilitat e bona accion, autant des organizadors/monitors coma des
pròpris usatgèrs.
“Des der Ajuntament de Vielha e Mijaran volem qu’es nòsti/nòstes joeni/es poguen contunhar en tot hèr espòrt pendent era sua formacion academica, e qu’ac hèsquen damb totes es mesures de seguretat e igiene possibles”, comente eth còsso d’espòrts e dusau tinent d’alcalde de Vielha e Mijaran, Alberto López. E hig que “laguens d’aguesta cession, ei responsabilitat de toti, professorat e alumnat, seguir es pautes qu’establís er actuau protocòu, entà hèr un emplec avient des installacions esportives municipaus entà previer eth contagi dera COVID-19”.