Notícies Veir istoric
Er Ajuntament de Vielha e Mijaran apròve un protocòu entà regular er accès e emplec as installacions esportives municipaus damb er inici deth cors d’activitats escolares e extraescolares
Aguest document establís es normes basiques de prevencion de contagi dera COVID-19 abantes, pendent e dempús dera practica esportiva autant entà usatgèrs, organizadors e public
Er equip de govèrn der
Ajuntament de Vielha e Mijaran a aprovat un protocòu entà regular er accès as
desparières installacions esportives municipaus (Palai d’Espòrts e Centre
Polivalent) damb er inici deth cors escolar. Un document a on s’establís un
conjunt de normes basiques de prevencion de contagi dera COVID-19 ena fasa de
represa dera pandémia.
Aguest protocòu s’includís
laguens deth Plan d’Accion peth desconfinament esportiu en Catalonha elaborat
pera Secretaria General de l’Esport i de l’Activitat Física e aprovat peth
PROCICAT.
Per un costat, s’includissen
es mesures generaus (distància interpersonau d’1,5 mètres, emplec obligatòri
dera mascarèta entàs majors des 6 ans e lauat de mans damb gel idroalcohòlic)
e, ath delà, tanben se definissen mesures concrètes segontes eth moment dera
activitat (abantes, pendent e dempús dera practica esportiva).
Abantes dera activitat, es
esportistes auràn de desplaçar-se individuaument o damb familhars convivents.
Tostemp que sigue possible auràn de portar era ròba de casa, entà minimizar er
emplec des vestiaris. Es organizadors auràn d’informar deth contingut deth
protocòu as monitors e usatgèrs, coma maxims responsables. Ath delà, en
generau, demore proïbida era preséncia de public, a excepcion de casi concrèti.
Pendent era activitat, es
usatgèrs auràn de mantier era distància de seguretat, desinfectar-se es mans
damb gel idroalcohòlic e portar era ròba en ua bossa pròpria.
Dempús dera practica
esportiva, es usatgèrs mantieràn era sua ròba ena bossa, mantieràn era
distància interpersonau e, en cas d’emplegar eth vestiari, non anaràn descauci,
damb un temps limitat de 5 menutes. Es organizadors supervisaràn era
circulacion des usatgèrs e deth public entà esvitar es aglomeracions. Tanben se
recomane esvitar es liuraments de prèmis e cerimònies. En cas de celebrar-se,
s’auràn de mantier es normes basiques vigentes, ath delà de mantier es prèmis e
pòdis enes melhores condicions d’igiene e seguretat.
D’aute biais, er Ajuntament a
incrementat era neteja e desinfeccion pendent toti es dies dera setmana e a installat
dispensadors de gel idroalcohòlic enes entrades des equipaments.
“Damb aguest protocòu establim
que se hèsque un emplec en condicions des installacions esportives de Vielha e
Mijaran, en tot previer eth risc de contagi dera COVID-19 pendent eth cors
esportiu 2020-2021”, comente eth còsso d’espòrts e segon tinent d’alcalde de Vielha e
Mijaran, Alberto López. E hig que “ei responsabilitat de
toti/es seguir es normes establides entà esvitar rebròts e gésser d’aguesta
situacion çò de mès lèu possible”.
09/09/2020