Notícies Veir istoric
Era Junta de Govèrn apròve es bases des subvencions e ajudes entà paliar es efèctes dera crisi economica originada pera COVID-19
Aguestes ajudes s’aufrissen autant a nivèu familhar, escolar e empresariau, en tot destinar-i era despena que non s’an podut realizar enguan entàs hèstes majors e en airau de cultura per un import de 119.500€
Aguest mes de seteme, era
Junta de Govèrn der Ajuntament de Vielha e Mijaran a aprovat es bases des
subvencions e ajudes extraordinàries entà ajudar a paliar es efèctes dera crisi
economica que s’a originat arraïtz dera crisi sanitària provocada pera
COVID-19.
En aguest sens, i a tot un
seguit de linhes d’ajuda que s’aplicaràn en tot destinar es sòs previsti entà
inversions en airau culturau e des hèstes majors deth municipi que non s’an
podut realizar com a conseqüéncia dera pandémia.
Era Junta de Govèrn destine ajudes entà participar enes casaus e activitats esportives que se realizen en municipi e a pagar er abonament deth Palai de Gèu as familhes damb 20.000€ e ajudes entara crompa de materiau escolar ena Escòla Garona per valor de 22.000€ a toti es mainatges e mainades empadronadi en municipi. Tamben s’articularà un conveni damb era Escòla Garona entara crompa de libres entar alumnat per impòrt de 7.500€. Atau madeish, se destinen ajudes entà crompar libres as escolars dera ESO, Bachilierat e Cicles Formatius per 20.000€.
Tanben se dauriràn linhes
d’ajudes a PYMES e autònoms per valor de 50.000€ entath pagament dera despena des materiaus e EPI de
proteccion deuant dera COVID-19 qu’aueren de crompar entar inici dera sua
activitat dempús der estat d’alarma.
“Des der Ajuntament de Vielha e Mijaran mos comprometérem a ajudar as familhes e ath
sector empresariau deth municipi, entà sajar en çò que sigue possible melhorar
era sua situacion economica, en un moment d’ua fòrta crisi originada pera
pandémia dera COVID-19”, comente eth baile de Vielha e Mijaran, Juan
Antonio Serrano. E hig que “ara madeish, era prioritat son es
familhes, er objectiu principau ei lutar entà que toti/es poguen gésser
endeuant, e per aquerò destinam sòs qu’èren previsti en d’auti airaus.”.
Aguestes
ajudes seràn publicades enes proplèu dies en tauler d’anoncis e ena plana web
der Ajuntament de Vielha e Mijaran damb es corresponentes bases reguladores
entara sua concession.
07/09/2020