Notícies Veir istoric
Entren en vigor es naues restriccions entath tabac e òci nocturn en Catalonha
A compdar d’aué, 18 d’agost, s’activen en Catalonha es naues mesures extraordinàries dera Generalitat de Catalunya entà previer eth risc de contagi dera COVID-19
Aué dimars, 18 d’agost, entren en vigor en Catalonha es mesures extraordinàries aprovades pera Generalitat de Catalunya, qu’establís era Resolucion SLT/2073/2020, de 17 d’agost, entà previer eth risc de contagi dera COVID-19, deuant er augment de contagis que se producís en territòri.
En aguest sens, s’adapten cèrtes restriccions enes establiments d’ostalaria, restauracion, terrasses e bars: S’aurà de garantir era distància interpersonau minima d’1,5 mètres en servici de barra, enes taules e enes agrupacions de taules, damb un maxim de 10 persones. Atau madeish, s’establís un orari de barrament entàs 01:00 coma maxim, e non se poderà adméter naui clients a compdar des 00:00 ores.
Tanben entren en vigor restriccions en çò que tanh ath tabac e assimiladi: Non se poderà humar ena via publica o espacis ar aire liure quan non se pogue respectar ua distància minima interpersonau d’un minim de 2 mètres. Aguesta limitacion ei aplicable, tanben, entar emplec de quinsevolh aute dispositiu d’inalacion de tabac, pipes d’aigua, cachimbes o assimiladi.
Atau
madeish, se recomane limitar es trobades sociaus dehòra deth grup de
convivéncia estable, e damb un limit de 10 persones.
Er incompliment d’aguestes mesures pòt supausar ua infraccion administrativa.
18/08/2020