Notícies Veir istoric
Er Ajuntament de Vielha e Mijaran implemente eth servici d’atencion ara ciutadania damb cita prealabla a trauès dera sedença electronica
Entà esvitar aglomeracions de persones en es servicis tecnics e administratius pendent era naua normalitat se programaràn es visites per telefòn o per Internet e tanben s’aufrirà, coma nauetat, era atencion per videoconferéncia
Er Ajuntament de Vielha e Mijaran amplie eth servici d’atencion ara
ciutadania damb diuèrses modalitats, autant presenciaus com a distància, entà
melhorar es prestacions des diuèrsi departaments (secretaria, servicis tecnics
e atencion ath ciutadan) entà realizar toti aqueri tramits qu’agen de besonh.
En aguest sens, s’implemente, coma nauetat, eth servici d’atencion damb
cita prealabla a trauès dera sedença electronica: https://vielha-mijaran.eadministracio.cat/,
de manèra que se poderàn planificar es visites, atau coma auer un contròl der
aforament enes servicis administratius deth consistòri. En çò que tanh ath
servici d’Atencion Ath Ciutadan, er orari de visites serà de deluns a diuendres
des 09:00 as 13:00, autant entath departament de Registre coma deth Padron. Eth
servici de Secretaria serà disponible entà recéber visites es dimars e dijaus
des 10:00 as 14:00, e enes Servicis Tecnics, er Arquitècte Tecnic atierà
visites es dimèrcles e diuendres des 10:00 as 14:00.
Ua auta des nauetats ei era implementacion deth servici d’atencion ara
ciutadania per videoconferéncia tanben a trauès dera sedença electronica, de manèra
que s’evitarà eth desplaçament des vesins e vesies enquiath consistòri. Ua
mesura damb era que non serà de besonh installar cap tipe de programa
informatic, e ara que tanben s’i poderà accedir a trauès des telefòns mobils o
tauletes digitaus. En moment dera confirmacion dera cita prealabla se li
facilitarà ath/ara ciutadan/a er enlaç dera videoconferéncia. I poderà accedir
dètz menutes abantes dera cita, e se demorarà cinc menutes de cortesia dempús
dera ora establida, passats es quaus, s’anullarà.
Per tant, damb aguesta ampliacion, eth consistòri aufrirà ua atencion ath
ciutadan de manèra complèta, mès en tot auer de demanar cita prealabla ja sigue
entara atencion presenciau, coma telefonica o per videoconferéncia.
“Pòc a pòc es
servicis administratius der Ajuntament de Vielha e Mijaran tornen a aufrir ua
atencion complèta ath ciutadan, mès mos ac cau hèr en tot seguir un seguit de
mesures de prevencion deth risc de contagi dera COVID-19”, comente eth baile de Vielha e Mijaran, Juan Antonio Serrano. E hig que “era
sedença electronica ei un estrument de besonh entath ciutadan, damb eth que
s’eviten desplaçaments, e se pòden realizar fòrça tramits rapida e
comodaments”.
31/07/2020